මීගමුව කොට්ඨාස බුද්ධි අංශ නිලධාරීන් අනාවරණය කර ගත් තොරතුරක් මත මීගමුව කොට්ඨාස අපරාධ විමර්ශන අංශයේ නිලධාරීන් 2024.09.17 වැනි දින උදෑසන මීගමුව නගර මධ්‍යයේ සැක කටයුතු ලෙස හැසිරෙමින් සිටි පුද්ගලයකු අත්අඩංගුවට ගෙන සිදු කළ ප්‍රශ්නකිරීම්වලදී ගෙවල් බිඳීම් හා දේපළ සොරකම් කිරීම් රැසකට ඔහු සම්බන්ධ බවට හඳුනාගෙන ඇත.
මෙලෙස අත්අඩංගුවට පත්ව ඇත්තේ මීගමුව, දළුපොත පදිංචිකරුවකු වන 39 වියැති රුවන් මදුශාන් නමැත්තෙකි. ඒ අනුව මීගමුව, කොච්චිකඩේ සහ කටාන පොලිස් වසම් තුළ සිදු කරන ලද ගෙවල් බිඳුම් 23ක් සම්බන්ධව තොරතුරු අනාවරණය කරගෙන තිබේ. සොරකම් කරන ලද ලැප්ටොප් 8ක්, රන් ගුලි 1ක්, රන් මාලයක්, රන් මුදුවක්, ජංගම දුරකතන 3ක්, රූපවාහිනි යන්ත්‍රයක්, පාපැදි 4ක්, ග්‍රයින්ඩර් 2ක්, ග්‍රිල් යන්ත්‍ර 2ක්, විදුලි පංකා 2ක්, ගිටාරයක්, ගෑස් සිලින්ඩරයක්, විදේශිය මත්පැන් බෝතල් 2ක් සහ සුවඳ විලවුන් බෝතල් 6ක් ඇතුළු දේපළ රැසක් විමර්ශන නිලධාරීන් විසින් සොයාගෙන පොලිස් භාරයට ගෙන තිබේ.
මීගමුව ජ්‍යෙෂ්ඨ පොලිස් අධිකාරි එරික් පෙරේරා මහතාගේ උපදෙස් අනුව මීගමුව කොට්ඨාස අපරාධ විමර්ශන අංශයේ ස්ථානාධිපති ප්‍රධාන පොලිස් පරීක්ෂක චන්දන රණසිංහ මහතාගේ අධීක්ෂණය යටතේ උප පොලිස් පරීක්ෂක සුදත් ගුණවර්ධන, පොලිස් සැරයන්වරුන් වන (41466) වසන්ත, (61836) ඉන්දික, (60490) සෙනවිරත්න, පොලිස් කොස්තාපල්වරුන් වන (82685) උදයකුමාර, (99759) තෙන්නකෝන්, කා.පො.කො. (12729) සුලක්‍ෂණී, පො.කො.රි. (89904) මදුශංක යන නිලධාරීහු මෙම වැටලීමට එක්වූහ.
කොච්චිකඩේ – ඩී. මිහිඳුකුල, කටාන – බර්ටි වීරසිංහ
