ඉදිරි මහකන්න දෙකට මෙරට ගොවීන්ට බණ්ඩි පොහොර (MOP) මෙට්‍රික් ටොන් 55,000ක් නොමිලේ ලබාදීමට වන අවබෝධතා ගිවිසුමට ඊයේ (20) අත්සන් තැබිණි.
ලෝක ආහාර වැඩසටහන යටතේ හිමිවන මේ බණ්ඩි පොහොර ගොවීන් වෙත ලබාදීම සඳහා වන ගිවිසුමට එළඹීම මාර්ගගත ක්‍රමයට (ONLINE)සිදු වූ අතර ලෝක ආහාර වැඩසටහන වෙනුවෙන් එහි සභාපතිවරයා සහ ශ්‍රී ලංකාව වෙනුවෙන් රාජ්‍ය පොහොර සංස්ථාවේ සභාපති ආචාර්ය ජගත් පෙ‍රේරා මහතා අත්සන් තැබූහ.
ශ්‍රී ලංකාවට නොමිලේ හිමිවන මේ පොහොර තොගයේ වටිනාකම ඩොලර් බිලියන 8කි. රුසියාවේ සිට ගෙන්වන මේ බණ්ඩි පොහොර මෙට්‍රික් ටොන් 55,000 ලබන මාසයේදී මෙරටට ලැබීමට නියමිතය.මේ පොහොර බෙදාහැරීමේ කටයුතු සහ එම බදු වෙනුවෙන් වැය කිරීමට සිදුවන මුදල රුපියල් බිලියන 2.5ක් වන අතර එම මුදල රජය මඟින් ලබාදීමට අමාත්‍ය මණ්ඩලයේ අනුමැතිය ලැබී තිබේ.
මෙරට වී වගාවට සහ බඩ ඉරිඟු වගාවට අත්‍යවශ්‍ය පොහොර වර්ගයක් වන බණ්ඩි පොහොර හෙවත් MOP පොහොර පසුගිය කන්න කීහිපයකදීම ගොවීන් විසින් වී වගාවට යොදා නොතිබිණි.සාමාන්‍ය වෙළෙඳපොළේ MOP පොහොර මිටියක මිල රුපියල් 8000-9000 වන අතර එහි අධික මිල ගණන් හේතුවෙන් ගොවීන් ඒවා තම වගාවන් සඳහා යෙදීමට කටයුතු කළේ නැත.සාමාන්‍යයෙන් එක් කන්නයකට අවශ්‍ය බණ්ඩි පොහොර ප්‍රමාණය මෙට්‍රික් ටොන් 25,000කි.
මේ කාරණය සැලකිල්ලට ගනිමින් ඉදිරි මහකන්න දෙකේදී වී ගොවීන්ට සහ බඩඉරිඟු වගා කරන ගොවීන්ට MOP පොහොර නොමිලේ ලබාදීම සඳහා රජය ලෝක ආහාර වැඩසටහන සමඟ සාකච්ඡා කෙරිණි.එහි ප්‍රතිඵලයක් වශයෙන් MOP පොහොර මෙට්‍රික් ටොන් 55,000ක් මෙරටට නොමිලේ ලබාදීමට ලෝක ආහාර වැඩසටහන තීරණය කරන ලදි.
