දැනුම සහ කුසලතාව සතු නම්, සියලු අභියෝග ජයගනිමින් දියුණුව කරා යෑමට සියලු කාන්තාවන්ට හැකි බව පාර්ලිමේන්තු මහ ලේකම් කුෂානි රෝහණදීර මහත්මිය ප්‍රකාශ කළාය.
මහ ලේකම්වරිය මේ බව ප්‍රකාශ කළේ මිලාගිරිය ශාන්ත පාවුළු බාලිකා විද්‍යාලයේ ශිෂ්‍ය පාර්ලිමේන්තුවේ මංගල සභාවාරය ආරම්භ කිරීමේ අවස්ථාවට ප්‍රධාන ආරාධිතයා ලෙස සහභාගි වෙමිනි.
මෙහිදී වැඩිදුරටත් අදහස් දක්වමින් මහ ලේකම්වරිය දැනට පාර්ලිමේන්තුවේ සුළුතරයක් වූ කාන්තා මන්ත්‍රීවරියන් විසින් කර ඇති විශාල කාර්ය භාරය පිළිබඳව සිහිපත් කරමින් පාර්ලිමේන්තු ක්‍රියාවලිය හා එහි කාර්යභාරය පිළිබඳව ද දැනුවත් කළාය.
මිලාගිරිය ශාන්ත පාවුළු බාලිකා විද්‍යාලයීය ශිෂ්‍යාවන්ට පාර්ලිමේන්තු ක්‍රමවේදය පිළිබඳ ප්‍රායෝගික අත්දැකීම් ලබාදීම අරමුණු කරගෙන එම විද්‍යාලය හා ශ්‍රී ලංකා
පාර්ලිමේන්තුවේ සන්නිවේදන දෙපාර්තමේන්තුව එක්ව මේ වැඩසටහන සංවිධාන කර තිබිණ.
මෙහිදී අදහස් දක්වමින් ඒ මහතා ශිෂ්‍ය පාර්ලිමේන්තු මඟින් නායකත්ව ගුණාංග තම ජීවිතයට එක්කර ගැනීමේ වැදගත්කම පෙන්වා දුන් අතර ජීවිතයේ අභියෝග ජය ගැනීම සඳහා අවශ්‍ය පන්නරය ද ශිෂ්‍ය පාර්ලිමේන්තු මඟින් ලබා ගත හැකි බව පෙන්වා දුන්නේය.
ඒ අනුව මෙහිදී මිලාගිරිය ශාන්ත පාවුළු බාලිකා විද්‍යාලයේ ශිෂ්‍ය පාර්ලිමේන්තුවේ මංගල සභාවාරය අරඹමින් කථානායකවරයා තෝරා පත්කර ගැනීම සිදුවිය.
අනතුරුව අගමැති ඇතුළු අමාත්‍ය මණ්ඩලය හා මන්ත්‍රී කණ්ඩායම දිවුරුම් දීම සිදුවිය. පසුව ශිෂ්‍ය පාර්ලිමේන්තුවේ එක් එක් අමාත්‍යවරිය විසින් තම අමාත්‍යාංශ
මඟින් ක්‍රියාත්මක කිරීමට යෝජිත සැලසුම් පිළිබඳව සභාව දැනුවත් කෙරිණ.
ශිෂ්‍ය පාර්ලිමේන්තුව නියෝජනය කරන සිසුවියන් සඳහා සහතිකපත්‍ර ලබාදීමද පාර්ලිමේන්තු මහ ලේකම්වරියගේ ප්‍රධානත්වයෙන් සිදුවිය. මේ අවස්ථාවට මිලාගිරිය ශාන්ත පාවුළු බාලිකා විද්‍යාලයේ විදුහල්පතිනි සුරේකා සිරිවර්ධන මහත්මිය, නියෝජ්‍ය විදුහල්පතිනිය, ශිෂ්‍ය පාර්ලිමේන්තුව භාර ආචාර්ය ධම්මිකා දිසානායක, විද්‍යාලයේ ආචාර්ය මණ්ඩලයේ මහත්ම මහත්මීන් සහ මවුපියන් ඇතුළු පිරිසක් සහභාගි වී සිටියහ.
මේ අවස්ථාවට පාර්ලිමේන්තුවේ අධ්‍යක්ෂ (ව්‍යවස්ථාදායක සේවා) හා වැඩබලන අධ්‍යක්ෂ (සන්නිවේදන) එම්.ජයලත් පෙරේරා මහතා ද සහභාගි විය.
