2024 ජනාධිපතිවරණය සඳහා හම්බන්තොට දිස්ත්‍රික්කයේ ඡන්ද දායකයන් පන්ලක්ෂ විසිදහස් නවසිය හතළිස් දෙනකුට (520,940) ඡන්දය ප්‍රකාශ කිරීම සඳහා ඡන්ද මධ්‍යස්ථාන 416ක් සූදානම් කර ඇත.
මුල්ගිරිගල, බෙලිඅත්ත, තංගල්ල හා තිස්සමහාරාමය යන මැතිවරණ කොට්ඨාස හතර තුළ මෙම ඡන්ද මධ්‍යස්ථාන 416 ක්‍රියාත්මක කෙරේ. ඡන්ද මධ්‍යස්ථාන කරා හිස් ඡන්ද පෙට්ටි, ඡන්ද පත්‍රිකා හා අදාළ රාජ්‍ය නිලධාරීන් පිටත්කර යැවීම අද (20) උදෑසන 7.00 සිට හම්බන්තොට සුචි ජාතික පාසලේදී සිදු කරන බව හම්බන්තොට දිස්ත්‍රික් තේරීම්භාර නිලධාරි එච්.පී සුමනසේකර මහතා කීය.
ඡන්ද මධ්‍යස්ථාන කරා ඡන්ද පෙට්ටි හා නිලධාරීන් ප්‍රවාහනය කිරීමට රාජ්‍ය ආයතනවල රථවාහන හා පෞද්ගලික අංශයේ ද වාහන යොදා ගැනීම සිදු කෙරේ. හම්බන්තොට ගණන් කිරීමේ මධ්‍යස්ථානයේ සිට දුරින්ම පිහිටා ඇති ඡන්ද මධ්‍යස්ථානය වන්නේ කටුවන, උඩගොමඩිය ඡන්ද මධ්‍යස්ථානයයි.
ඡන්ද මධ්‍යස්ථාන, රජයේ පාසල්, ප්‍රජා ශාලා, විහාරස්ථාන මෙවරත් යොදාගෙන ඇති අතර, අදාළ වසමේ ග්‍රාම නිලධාරීන් මඟින් ඡන්ද මධ්‍යස්ථානවල පහසුකම් සැලසීම සිදු කෙරේ. අයහපත් කාලගුණික තත්ත්වයක් ඇතිවුවහොත් ඒ සඳහා පෙර සූදානමක් ලෙස හම්බන්තොට දිස්ත්‍රික් ආපදා කළමනාකරණ ඒකකය සූදානමින් සිටින අතර විශේෂයෙන්ම වල් අලි තර්ජන ඇති ඡන්ද මධ්‍යස්ථාන පිහිටි ප්‍රදේශවලට ද වනජීවී නිලධාරීන්ගේ සහාය යොදා ගැනීමට අවශ්‍ය පියවර ගෙන ඇති බව ද හෙතෙම සඳහන් කළේය.
