මෙවර ජනාධිපතිවරණයේදී මහනුවර දිස්ත්‍රික්කයේ එකොළොස් ලක්ෂ අනූඑක් දහස් තුන්සිය අනූනව දෙනකු (1191399) ඡන්දය ප්‍රකාශ කිරීම සඳහා සුදුසුකම් ලබා තිබෙන බව මහනුවර දිස්ත්‍රික් තේරීම් භාර නිලධාරි චන්දන තෙන්නකෝන් මහතා පවසයි.
මේ පිළිබඳව වැඩිදුරටත් අදහස් දැක්වූ ඒ මහතා මෙසේ ද කීවේය.
“මහනුවර දිස්ත්‍රික්කයේ ආසන 13ක ඡන්ද කොට්ඨාස 890ක ඡන්ද මධ්‍යස්ථාන 890ක් ස්ථාපිත කර තිබෙනවා. මැතිවරණ රාජකාරි සඳහා රාජ්‍ය නිලධාරින් සංඛ්‍යාව 15,000ක් යොදවා තිබෙනවා. පොල්ගොල්ල සමුපකාර අභ්‍යාස ආයතනය, පොල්ගොල්ල විවෘත විශ්වවිද්‍යාලය, පොල්ගොල්ල මහවැලි ජාතික අධ්‍යාපනික විද්‍යා පීඨය සහ පොල්ගොල්ල ආදර්ශ පාසල යන පරිශ්‍රවල ඡන්ද ගණන් කිරීමේ මධ්‍යස්ථාන 124ක් ක්‍රියාත්මකයි. මැතිවරණ ආරක්ෂක කටයුතු වෙනුවෙන් පොලිස් නිලධාරින් 1000ක් සහ විශේෂ කාර්ය බළකා නිලධාරින් 300ක් යොදවා තිබෙනවා. මහනුවර දිස්ත්‍රික්කයේ ලියාපදිංචි තැපැල් ඡන්ද සංඛ්‍යාව 55,797ක්.”
