පොදු රාජ්‍ය මණ්ඩලයීය ක්‍රීඩා උලෙළේ වියදම් දැරීමට නොහැකි බව පවසා ඔස්ට්‍රේලියාවේ වික්ටෝරියා නගරය සත්කාරකත්වයෙන් ඉවත්වීමෙන් පසු ස්කොට්ලන්තයේ ග්ලාස්ගෝව් නගරය එහි සත්කාරකත්වය දැරිමට කැමැත්ත පළ කළේය. මේ හේතුවෙන් මීළඟ පොදු රාජ්‍ය මණ්ඩලයීය ක්‍රීඩා උලෙළ වසර 2026දී ස්කොට්ලන්තයේ ග්ලාස්ගෝව්හිදී පැවැත්වේ.
මේ සඳහා පොදු රාජ්‍ය මණ්ඩලයීය ක්‍රීඩා සම්මේලනය පවුම් මිලියන 100ක ආයෝජනයක් පොරොන්දු වූ අතර, එක්සත් රාජධානිය සහ ඔස්ට්‍රේලියාව ක්‍රීඩා උලෙළට මූල්‍ය සහාය ලබාදීම සහතික කළහ.
මෙයට පෙර පොදු රාජ්‍ය මණ්ඩලයීය ක්‍රීඩා උලෙළට 2014දී ස්කොට්ලන්තයේ ග්ලාස්ගෝව් සත්කාරකත්වය සැපයූ අතර, සංවිධායකයන් සමඟ පැවැති දීර්ඝ සාකච්ඡාවලින් පසුව, ස්කොට්ලන්ත රජය 2026 ක්‍රීඩා උලෙළ පැවැත්වීමට අත්සන් තැබීය. එහෙත් 2026දී ක්‍රීඩා ඉසව් ගණන අඩු කිරීමට සූදානමක් ඇතැයි පැවසේ.
2026 ඉසව්ව අවලංගු කිරීමෙන් පසු වික්ටෝරියානු රජය විසින් පොදු රාජ්‍ය මණ්ඩලයීය ක්‍රීඩා සම්මේලනයට වන්දි මුදලක් ගෙවා ඇති අතර, එම මුදලද ග්ලාස්ගෝව් වෙත ලබාදීමට එකඟවී ඇත. පොදු රාජ්‍ය මණ්ඩලයීය ක්‍රීඩා උලෙළේ අවසාන වියදම් පියවා ගැනීමට අපොහොසත් වුවහොත් එක්සත් රාජධානි රජය හදිසි අරමුදල් සඳහා පවුම් මිලියන 2.3ක් ලබා දීමට එකඟ වී ඇත.
1911දී ලන්ඩනයේ පැවැත්වීමෙන් පසු 1930දී කැනඩාවේ නිල වශයෙන් ආරම්භ වූ මේ ක්‍රීඩා උලෙළ බ්‍රිතාන්‍ය අධිරාජ්‍ය ක්‍රීඩා උලෙළ ලෙස ද හැඳින්වුණි. ශ්‍රී ලංකාව මෙතෙක් මේ ක්‍රීඩා උලෙළේ රන් පදක්කම් 4ක්, රිදි පදක්කම් 9ක් හා ලෝකඩ පදක්කම් 11ක් දිනා ඇත.
