ජේ.සී.බී. යන්ත්‍රයක ක්‍රියාකරු ලෙස සිටිමින් අයිතිකරුට නොදන්වා එය වෙනත් අයෙකුට විකුණා විදේශගත වීමට ගිය පුද්ගලයෙකු කටුනායක ගුවන් තොටුපොළ නිලධාරින් විසින් අත්අඩංගුවට ගෙන ගාල්ල පොලිසිය වෙත භාර දී තිබේ.
මෙසේ අත්අඩංගුවට ගෙන ඇත්තේ තිස්සමහාරාමය දියවරගම පදිංචි සැකකරුවෙකි.
ඇල්පිටිය ප්‍රදේශයේ පදිංචි පුද්ගලයෙකුට අයත් රුපියල් හැත්තෑ ලක්ෂයක් පමණ වටිනා ජේ.සී.බී. යන්ත්‍රයකට ක්‍රියාකරුවෙකු අවශ්‍ය බවට මුහුණුපොත හරහා පළකරන ලද දැන්වීමක් අනුව සැකකරු පැමිණ ඇත. එසේ පැමිණ ටික දිනකට පසු සැකකරු ජේ.සී.බී.යන්ත්‍රය වාලච්චේන ප්‍රදේශයේ වැඩට ගෙන ගොස් ඇත.
එසේ ගෙන ගොස් දින කිහිපයක් යන තුරු කිසිම තොරතුරක් නොවූ නිසාත් ඔහුගේ ජංගම දුරකතනය ක්‍රියා විරහිත කර තිබීම නිසාත් අයිතිකරු ගාල්ල පොලිසියට පැමිණිලි කර ඇත. ඒ අනුව සැකකරු සොයා තිස්සමහාරාමයට ගිය පොලිස් නිලධාරින්ට අනාවරණය වී ඇත්තේ සැකකරු කුඩා කල එම ලිපිනයේ සිටියත් මවුපියන් වෙන් වීම නිසා මේ වන විට එම නිවෙස හැරගොස් ඇති බවය.
මේ අතර සැකකරු විදේශගත වීමට බලාපොරොත්තුවෙන් සිටින බවට ලද තොරතුරක් අනුව පොලිසිය අධිකරණ නියෝගයක් ලබාගෙන සැකකරු විදේශගත වීමට පැමිණි විට රඳවා තබාගන්නා ලෙස ආගමන විගමන පාලකවරයාට දන්වා ඇත.
ඒ අනුව සැකකරු කුවේට් රාජ්‍යය බලා යෑමට පැමිණි අවස්ථාවේ අත්අඩංගුවට ගෙන ගුවන් තොටුපොළ පොලිසියට භාර දී ඇත. එහිදී කරන ලද පරීක්ෂණවලදී අනාවරණය වී ඇත්තේ සැකකරු කිසිදිනක පදිංචි වී සිට නැති කුරුණෑගල දිස්ත්‍රික්කයේ පොලිස් ස්ථානයකින් වැල්ලව ප්‍රදේශයේ පදිංචි බව සනාථ කරමින් පොලිස් වාර්තා සහ නිෂ්කාශන වාර්තා ලබාගෙන ඇති බවය.
පසුව සැකකරු ගාල්ල පොලිසියට භාර දී තිබේ. සැකකරු පවසා ඇත්තේ ජේ.සී.බී. යන්ත්‍රය වාලච්චේන ප්‍රදේශයේ කුඹුරු වැඩ කරමින් සිටියදී හඳුනාගත් මොනරාගල ප්‍රදේශයේ පදිංචි අයකු සමඟ එක්ව ලොරියක පටවාගෙන පැමිණ කඩුවෙල ප්‍රදේශයේ පුද්ගලයෙකුට විකුණූ අතර, එහිදි තමාට රුපියල් ලක්ෂ දෙකක මුදලක් ලැබුණු බවය.
