රතු ෂර්ට් දාගෙන හිටපු පිරිස අද දම් පාට වෙලා ජනතාව ගොනාට අන්දනවා දැකීමත් කැතයි, ලැජ්ජයි වගේම හිරිකිත බව පෙරටුගාමී සමාජවාදී පක්ෂයේ මධ්‍යම කාරක සභික ආර්.කේ. ඉන්ද්‍රනන්ද ද සිල්වා මහතා ප්‍රකාශ කළේය. ඔහු මේ බව පැවසුවේ පෙරටුගාමි සමාජවාදි ජනතා සංසදයේ ජනාධිපති ධුර අපේක්ෂක නීතිඥ නුවන් බෝපගේ මහතාගේ ජයග්‍රහණය උදෙසා පෙරටුගාමි සමාජවාදි පක්ෂයේ සංවිධානයෙන් මැදිරිගිරියේදී පැවති ජන හමුවකට පෙරේදා (15) එක් වෙමිනි.
එහිදී වැඩිදුරටත් අදහස් දැක්වූ ආර්.කේ. ඉන්ද්‍රනන්ද ද සිල්වා මහතා:
“සමහරු අද ජේවීපී එකේ රැස්වීම්වලට ගිහිල්ලා ප්‍රධාන ආරාධිත අමුත්තො විදියට පොල්තෙල් පහන දල්වනවා. රෝහණ විජේවීර සහෝදරයට වෙඩි තියලා ආදාහනාගාරයට විසි කරන කොට බැම්මෙ වැදිලා බිම වැටිලා කෙඳිරි ගානකොට “තොපිට බැරිද” කියලා කෑගහලා රෝහණ සහෝදරයව පණ පිටින් ආදාහනාගාරයට විසි කරපු අයයි ඒ. මම නමත් එක්ක කියනවා. පුළුවන් නම් මට නඩු දාන්න. එතන ජායාරූප ගත්තෙ මමයි. මම ලෑස්තියි උසාවියක් ඉදිරියේ මුහුණ දෙන්න. කාට හරි සැකයක් තිබෙනවා නම් මගේ ෆෝන්එකේ තිබෙන ෆොටෝස් පෙන්වන්නම්. ඒ අයගේ හෘදයසාක්ෂිය කුණු වෙලාද? යුක්තිය ඉල්ලපු මිනිස්සුන්ට සාධාරණ ඉටු නොකළ අය වේදිකාවල එකට ලගිනවා. රෝහණ සහෝදරයාගෙ ඝාතනය මුළු ලෝකෙටම කියලා අවුරුදු 8ක් හිරේ හිටපු මට ඒ එයත් එක්ක මාලිමා වේදිකාවෙ ඉන්න බැහැ. අනුර කුමාර දිසානායක මාත් එක්ක එකට පක්ෂයේ වැඩ කරලා තිබෙනවා. අපිත් එක්ක රතු ෂර්ට් දාගෙන හිටපු අය අද දම් පාට වෙලා ජනතාව ගොනාට අන්දන විදිය දැක්කම අනුර කැතයි, ලැජ්ජයි, හිරිකිතයි.
“ඔවුන්ගේ ප්‍රතිපත්ති ප්‍රකාශයේ කොහෙවත් අධ්‍යාපනය පෞද්ගලීකරණය කරනවා කියලා නැහැ. අධ්‍යාපනය රජයේ වගකීමක් කියලා තමයි තියන්නෙ. පිටු 233කින් යුත් මාලිමාවේ ඇත්ත ප්‍රතිපත්ති ප්‍රකාශය යූටියුබ් එකේ තියනවා. ඒකෙ තියනවා පෞද්ගලික විශ්වවිද්‍යාල හදනවා කියලා. ඒක කොළේ ලියලා නැහැ. නිදහස් අධ්‍යාපනයෙන් උපාධියක් ගත්තු අනුරට පුළුවන්ද අධ්‍යාපනය විකුණනවා කියන්න? පුදුම වෙන්න එපා. අනුරගෙ දරුවා ගියේ පෞද්ගලික විශ්වවිද්‍යාලයකට. ජොබ් එකක් කරන්නෙ නැහැ. බිරියට රැකියාවක් නැහැ. කොහොමද දන්නෙ නැහැ පෞද්ගලික විශ්වවිද්‍යාලයකට ගියෙ. ලාල්කාන්තගේ සහ වටගලගෙ දරුවන් ගියෙත් පෞද්ගලික විශ්වවිද්‍යාලවලටයි. වසන්ත සමරසිංහ දූෂණ විරෝධී හඬ සංවිධානයේ කැඳවුම්කරුයි. ඒ දරුවා නම් තවම විශ්වවිද්‍යාල වයසෙ නැහැ. ඒත් යන්නෙ ජාත්‍යන්තර පාසලකට. අනුර කුමාරට පුළුවන් ද ඉතුරු දවස් 4 ඇතුළත රටට කියන්න 21 වැනිදාගෙන් පස්සෙ ඩඩ්ලි, නිපුණ වගේ හාල් මෝල් මාෆියාව ඉවරයි කියලා? මැදිරිගිරිය සමුපකාරයේ ලක්ෂ 40ක් හොරකම් කළා. විශ්‍රාම වැටුප්, නිල නිවාස අහෝසි කරනවා කියන්න කලින් ලාල්කාන්ත අවුරුදු 17ක් ඉන්නෙ කොහෙද කියලා කියන්න. පාර්ලිමේන්තුවේ මන්ත්‍රීවරුන්ගේ 45 ඩී නිල නිවෙසේයි.”
