ශ්‍රී ජයවර්ධනපුර රෝහලේ රසායනාගාරය මඟින් සිදු කරන පරීක්ෂණවල මිල ගණන් සියයට 50කින් අවම කර රෝගීන්ට සහන ලබාදීමට රෝහල් පරිපාලනය පියවර ගෙන ඇතැයි රෝහලේ අධ්‍යක්ෂ වෛද්‍ය රත්නසිරි ඒ. හේවගේ මහතා ‘දිනමිණට’ ඊයේ (16) පැවසීය. දියවැඩියාව, රුධිර පීඩනය යනාදි බෝ නොවන රෝගවලට අදාළව ඇති පරීක්ෂණවල මිල ගණන් මෙසේ පහළ දමා ඇති බවත් රෝගීන්ට සහනයක් උදා කිරීම එහි අරමුණ බවත් ඒ මහතා පැවසුවේය. රෝහල ආරම්භ කර වසර 40ක් සපිරීම නිමිත්තෙන් මෙම සහන රෝගීන්ට ලබාදීමට රෝහල් පරිපාලනය පියවර ගෙන තිබේ. පූර්ණ රුධිර මට්ටම මැනීමේ පරීක්ෂණය ඇතුළු පරීක්ෂණ ගණනාවක් රෝහලේ රසායනාගාරය තුළින් සිදු කර ගැනීමේදී ඒවායේ මිල සියයට 50කින් අවම කර ඇති අතර රුපියල් 150ක් වැනි මුදලකින් එම පරීක්ෂණය කරගත හැකිය. එසේම FBS රුපියල් 150ක් ද PPBS රුපියල් 150ක් ද RBS රුපියල් 150ක් ද HbA1c රුපියල් 1400ක් ද T3 රුපියල් 1200ක් ද T4 රුපියල් 1200ක් ද TSH රුපියල් 1500ක් ද ESR රුපියල් 150ක් ද FBS රුපියල් 150ක් ද CRP රුපියල් 650ක් ද ලෙස අඩු මුදලකට මෙම පරීක්ෂණ සිදු කර ගැනීමට රෝගීන්ට දැන් හැකියාව ලැබී තිබේ.
රෝහල් රසායනාගාරය පැය විසිහතර පුරාම ක්‍රියාත්මක අතර ගුණාත්මක හා කාර්යක්ෂම සේවාවක් රෝගීන්ට මෙම රසායනාගාරයෙන් ලබාදෙන බව ද වෛද්‍ය හේවගේ මහතා පැවසුවේය. මෙම පරීක්ෂණවල මිල සියයට 50කින් අඩු කර ඇත්තේ මිල වැඩිකම නිසා රෝගීන් පරීක්ෂණ සිදු කර නොගෙන සිටීම මඟ හැරවීමට සහ රෝගීන්ගේ ආර්ථික පීඩාවට සහනයක් ලබාදීමට යැයි ද ඒ මහතා ප්‍රකාශ කළේය.
සන්ධ්‍යා කරුණාරත්න
