‘ජනමාධ්‍ය සාමූහිකය’ මාධ්‍ය සංවිධානය විසින් මෙවර ජනාධිපතිවරණයට ඉදිරිපත් වී සිටින අපේක්ෂකයන් වෙත ඉදිරිපත් කිරීමේ කෙටුම්පත් කරන ලද ‘නව නිදහස් මාධ්‍ය යුගයක්’ යෝජනාවලිය ජනාධිපති රනිල් වික්‍රමසිංහ මහතා කොළඹ පදනම් ආයතනයේදී ඊයේ (13) වෙත පිළිගන්වන ලදි.
ජනාධිපති රනිල් වික්‍රමසිංහ මහතාගේ මැතිවරණ ප්‍රචාරණ වැඩසටහනක් ලෙස ප්‍රජා සංවිධාන හා එම සංවිධානවල නායකයන්, නියෝජිතයන් හමු වූ Momentum 24 සමුළුවට සහභාගි වෙමින් එම යෝජනාවලියේ පිටපතක් ජනාධිපති රනිල් වික්‍රමසිංහ මහතාට පිළිගැන්වූ ජනමාධ්‍ය සාමූහිකයේ නියෝජිතයන් එහිදී ජනාධිපතිවරයාගෙන් ඉල්ලා සිටියේ ජනමාධ්‍ය ක්ෂේත්‍රය හා ජනමාධ්‍යවේදීන් සමඟ සමීපව කටයුතු කළ නායකයකු ලෙස මෙරට මාධ්‍ය නිදහස සුරක්ෂිත කිරීමට ජනාධිපති රනිල් වික්‍රමසිංහ මහතා ප්‍රමුඛත්වයක් දිය යුතු බවයි. සමාජ මාධ්‍ය නියාමන පනත ඉවත් කරගන්නා ලෙසත්, විවිධ රාජ්‍ය පාලන සමයන් තුළ ඝාතනය වූ, අතුරුදන් කළ හා පහර දෙනු ලැබූ මාධ්‍යවේදීන්ට යුක්තිය පසිඳලීමට කටයුතු කරන ලෙසත් මෙහිදී ජනමාධ්‍ය සාමුහිකයේ නියෝජිතයෝ ජනාධිපතිවරයාගෙන් ඉල්ලා සිටියහ.
මේ අවස්ථාවට එම ජනමාධ්‍ය සාමූහිකය මාධ්‍ය සංවිධානය වෙනුවෙන් මාධ්‍යවේදීන් වන තිළිණ අලහකෝන්, පුෂ්පා වීරසේකර, ප්‍රේම් කුලතිලක, ධනුෂ්ක ෆොන්සේකා, කමල් සිරිවර්ධන, කොලින් හරිස්චන්ද්‍ර මහත්ම මහත්මීහු සහභාගි වූහ.
