නවගත්තේගම පොලිස් වසමට අයත් වෙලේවැව ප්‍රදේශයේ නිවෙසකට හඳුනාගත නොහැකි අන්දමින් වෙස් මුහුණු පැලඳගත් පුද්ගලයන් දෙදෙනකු කඩාවැදී නිවසේ සිටි පුද්ගලයකුට දරුණු ලෙස පහර දීමෙන් තුවාල ලබා ඇති අතර, ඔහු ප්‍රතිකාර සඳහා නවගත්තේගම රෝහලට ඇතුළත් කොට තිබේ.
මෙසේ පහර කෑමට ලක්ව ඇත්තේ වෙලේවැව ප්‍රදේශයේ පදිංචි සුනන්ද තිලකරත්න නමැති වයස අවුරුදු 42ක පුද්ගලයෙකි.
1994 වර්ෂයේ සිට ඔහු එක්සත් ජාතික පක්ෂයේ ක්‍රියාකාරී ප්‍රබල සාමාජිකයකු වන අතර, මෙවර ජනාධිපතිවරණයට රනිල් වික්‍රමසිංහ මහතාට සහාය පළ කරමින් සංවිධාන කටයුතුවල නිරත වන අයෙකි.
පහර කෑමට ලක් වූ පුද්ගලයා තම නිවස ඉදිරිපිට පුටුවක වාඩි වී සිටියදී ඉකුත් 09 වෙනි දින රාත්‍රී 8.00ට පමණ වෙස්මුහුණු සහිතව පැමිණි පුද්ගලයන් දෙදෙනා කිසිදු විමසීමකින් තොරව එකවර පහර දී නිවස පිටුපසින් පලා ගොස් ඇති බව ප්‍රහාරයට ලක්වූ අය පොලිසිය හමුවේ පවසා තිබේ. පහර දීමෙන් ඔහුගේ වම් ඇස ප්‍රදේශයට දරුණු ලෙස තුවාල සිදුව තිබේ.
අනතුරුව නිවැසියන් ඔහු කඩිනමින් ප්‍රතිකාර සඳහා නවගත්තේගම රෝහලට ඇතුළත් කර තිබේ.
පලාගිය සැකකරුවන් තවමත් හඳුනාගෙන නැත. සිද්ධිය සම්බන්ධව නවගත්තේගම පොලිසිය විමර්ශන කටයුතු සිදු කරයි.
