රථය පොලිස් භාරයට
කාලයක් තිස්සේ ජාවාරම ජයටම කරලා
කුලී පදනම මත ලබා ගත් මෝටර් රථයකින් නීති විරෝධී මත්පැන් (කසිප්පු) ප්‍රවාහනය කරමින් සිටි සැකකරුවන් දෙදෙනකු අත්අඩංගුවට ගෙන අධිකරණයට ඉදිරිපත් කිරීමෙන් අනතුරුව රුපියල් දෙලක්ෂ තිස් දහසක දඩ මුදලක් ගෙවන ලෙසත්, මෝටර් රථය පොලිසිය භාරයේ තබා ගන්නා ලෙසත් මොරටුව මහේස්ත්‍රාත් උද්දාල සුවන්දුරුගොඩ මහතා නියෝග කළේය.
මෙසේ දඩ නියම වූයේ හිරණ සහ දියතලාව ප්‍රදේශවල පදිංචිකරුවන් දෙදෙනකුටය. මහා පරිමාණ මත්පැන් බෙදාහරින ජාවාරම්කරුවකු මෝටර් රථයකින් ගමන් කරන බවට එගොඩඋයන පොලිසියට ලද තොරතුරකට අනුව මෙම වැටලීම සිදු කර තිබේ. හිරණ සිට මොරටුව බලා ගමන් කරමින් තිබූ මෙම මෝටර් රථය එගොඩඋයන, රණවිරු රංජිත් පීරිස් මාවතේදී එගොඩඋයන පොලිසිය විසින් අත්අඩංගුවට ගෙන සිදු කරන ලද විමර්ශනයේදී එහි තිබී පොලිතින් මලු පහක් අත්අඩංගුවට ගත් අතර, කසිප්පු ස්ප්‍රීතු මිලිලීටර් 168,750ක් එහි තිබූ බව පොලිසිය පැවසීය.
හිරණ පදිංචි පුද්ගලයා ප්‍රධාන සැකකරු වන අතර, අනෙක් පුද්ගලයා ඔහුගේ සහායකයා ලෙස කටයුතු කර තිබේ. මෙම සැකකරුවන් දංකොටුව ප්‍රදේශයෙන් ලබා ගන්නා ලද මෙම නීති විරෝධී මත්පැන් පානදුර, අඟුලාන, මොරටුව, ලුනාව, මිරිස්වත්ත, මහවිල රෑ කඩේ, එගොඩඋයන, හිරණ ආදී ප්‍රදේශවලට බෙදාහරින බවට අනාවරණය වී තිබේ. කාලයක් තිස්සේ මොවුන් මෙම ජාවාරම රහසිගතව සිදු කර ඇති බව පොලිසිය සඳහන් කළේය.
