කෑගල්ල, හෙට්ටිමුල්ල, මීදෙණිය සිව්හෙළ නර්තන රංගායතනයේ නර්තනය හැදෑරූ දරුවන් 32 කට හිස වෙස් හා ශීර්ෂාභරණ පැලඳවීමක් ඉකුත් දා කෑගල්ල හෙට්ටිමුල්ල මීදෙණිය ශ්‍රී සංඝබෝධි විහාරස්ථානයේ දී සිදු කළ බව රංගායතනාධිපති ප්‍රවීණ නර්තන ශිල්පී දේශබන්දු එම්.ඒ. ලහිරු චාමර සෝමසිරි මහතා පැවසීය. මෙහිදී පිරිමි දරුවන් 19 දෙනකුට හිස වෙස් හා ගැහැනු දරුවන් 13 දෙනකුට ශීර්ෂාභරණ පැලඳ වීම ආගමික වතාවත්වලට මුල් තැන දෙමින් හා චාරිත්‍රානුකූලව සිදු කෙරිණි. ඉකුත් 05 වැනිදා සවස චාරිත්‍රානුකූල ආගමික වතාවත් සිදු කර 06 වැනිදා අලුයම හිස වෙස් හා ශීර්ෂාභරණ පැලඳ වීම සිදු කෙරිණි. හිස වෙස් හා ශීර්ෂාභරණ පැලඳවීම සිදු කිරීමෙන් පසුව නවක දරුවන්ගේ කලඑළි මංගල්‍යය ද පෙරවරුවේ විහාරස්ථානයේ දී සිදු කෙරිණි. ආගමික වතාවත් හා කලඑළි මංගල්‍යයට ඓතිහාසික කටාරංගල රජමහා විහාරාධිපති ශ්‍රී සීලාලංකාර, මීදෙණිය සංඝබෝධි විහාරාධිපති පූජ්‍ය තලේවල නන්දසාර ස්වාමීන් වහන්සේලාගේ ප්‍රධානත්වයෙන් සිදු කෙරිණි. කලඑළි මංගල්‍යය නැරඹීමට ප්‍රදේශයේ විශාල ජනතාවක් එක්ව සිටියහ.
