දින අටක් ඇතුළත රට වටා පාපැදියෙන් ගමන් කිරීම ආරම්භ කළ පියකු සහ ඔහුගේ සහයට යතුරුපැදියෙන් රටවටා ගමන්කරන මවක හා දියණියක පිළිබඳ පුවතක් පෙරේදා (10) උදෑසන දඹුල්ලෙන් වාර්තා විය.
දඹුල්ල, සිසිරවත්ත ප්‍රදේශයේ පදිංචි යූ.ජී. රංජිත් නමැති 52 හැවිරිදි යුද හමුදා විශ්‍රාමිකයකු පාපැදියෙන් මෙසේ රට වටේම දින අටකින් ගමන් කිරීම ආරම්භ කර ඇති අතර, ඔහුගේ සහය සඳහා යතුරුපැදියකින් සිය බිරිය පුෂ්පා කුමාරී (48) මහත්මිය හා දියණිය තිළිණි මිහිඳුම් හංසිකා (24) එක්ව සිටීම විශේෂත්වයකි. වසර 28ක කාලයක් යුද හමුදා සිංහ රෙජිමේන්තුවේ රයිපල් සෙබළකු ලෙස සේවය කළ රංජිත් මහතා කියා සිටියේ, මීට පෙර ලංකාව පුරා පාපැදියකින් ගමන් කොට වාර්තාවක් තබා ඇත්තේ දින 12ක පමණ කාලයකින් බවයි. කෙසේවෙතත් තමන්ගේ එකම බලාපොරොත්තුව දින අටක් වැනි කෙටි කාලයකින් ලංකාව පුරාම පාපැදියෙන් ගමන් කිරීම බව ඒ මහතා සඳහන් කරයි.
දියණිය වන තිළිණි මිහිඳුම් හංසිකා මෙනෙවිය කියා සිටියේ, තම පියාගේ බලාපොරොත්තුව ඉටු කිරීම සඳහා පවුලේ සහය ලබාදෙන බවයි. තමන්ට තවත් සහෝදරයකු සිටින බවත්, ඔහු ද මේ වනවිට යුද හමුදාවේ සේවය කරන නිසාවෙන් ඔහුට නිවාඩු අහිමි වීම නිසා තමන් සහ මෑණියන් පියාගේ සහයෝගය සඳහා මෙම ගමනට යතුරුපැදියෙන් එක්වන බව ඇය කීවාය. ඒ අනුව මෙම පවුලේ පිරිසක් දඹුල්ල සිසිරවත්ත බෝධිය අසලින් පෙරේදා (10) උදෑසන 6.00ට ත්‍රිකුණාමලය බලා පිටත්වීම ආරම්භ කරන්නට විය. ඔවුන් ඊයේ (11) උදෑසන ත්‍රිකුණාමලයෙන් ගමන් ආරම්භ කොට පොතුවිල් හරහා හම්බන්තොට, ගාල්ල, මාතර, කොළඹ, හලාවත, පුත්තලම, මන්නාරම, මුලතිව්, යාපනය හරහා දින අටක් ගතවන විට නැවතත් ත්‍රිකුණාමලයෙන් දඹුල්ල නගරයට පැමිණෙන බව යූ.ජී. රංජිත් මහතා පැවසීය.
