කොළඹ – මහනුවර ප්‍රධාන මාර්ගයේ වරකාපොළ, දුම්මලදෙණිය ප්‍රදේශයේ දී බස් රථයක් හා ලොරි රථයක් ඊයේ (11) අලුයම එකිනෙක ගැටීමෙන් 20දෙනකු තුවාල ලබා වරකාපොළ රෝහලට ඇතුළත් කර ඇතැයි වරකාපොළ පොලිසිය පවසයි.
කෑගල්ල, තන්නිමලේ සිට කොළඹ බලා පෞද්ගලික බස් රථයක් ඊයේ (11) අලුයම ගමන් කරමින් තිබුණු බවත්, වරකාපොළ පොලිස් වසමේ දුම්මලදෙණිය ප්‍රදේශයේදී ඉදිරියෙන් කොළඹ සිට මහනුවර දක්වා ධාවනය වෙමින් තිබුණු ලොරි රථයක එකිනෙක ගැටී ඇති බවත් පොලිසිය කියයි. ලොරි රථයේ රියැදුරුවරයා ඇතුළු බස් රථයේ සිටි මගීන් 20දෙනකු තුවාල ලබා ගිලන් රථ මඟින් වරකාපොළ රෝහලට ඇතුළත් කර තිබේ. බරපතළ තත්ත්වයේ සිටි පුද්ගලයකු වැඩිදුර ප්‍රතිකාර සඳහා කෑගල්ල මහ රෝහලට මාරු කර යවා ඇති බවත්, සෙසු තුවාලකරුවන් වරකාපොළ රෝහලේ නේවාසිකව ප්‍රතිකාර ලබන බවත් පොලිසිය සඳහන් කරයි. අනතුර සම්බන්ධයෙන් වරකාපොළ පොලිසියේ ස්ථානාධිපති ප්‍රධාන පොලිස් පරීක්ෂක ඒ.ඩී.සී. ප්‍රසාද්, රථවාහන අංශයේ ස්ථානාධිපති පොලිස් පරීක්ෂක රංජිත් ප්‍රේමලාල් යන නිලධාරින් ඇතුළු කණ්ඩායමක් පරීක්ෂණ පවත්වයි.
