ජාතික ජන බලවේගයේ ජනාධිපති ධුර අපේක්ෂක අනුර කුමාර දිසානායක මහතාගේ ජයග්‍රහණය තහවුරු කිරීම සඳහා සංවිධාන කළ ජනහමුවක් ඉකුත් දා (08) තණමල්විල නගරයේදී පැවැත්විණ. මෙම රැලියට ජාතික ජන බලවේගයේ මධ්‍යම කාරක සභික ටිල්වින් සිල්වා මහතා සහභාගි වූ අතර, ජාතික ජන බලවේගයේ මොනරාගල දිස්ත්‍රික් සංවිධායක ආර්.එම්. ජයවර්ධන මහතා විසින් මෙම රැලිය සංවිධාන කර තිබිණ.
එහිදී අදහස් දැක්වූ ටිල්වින් සිල්වා මහතා මෙසේ පැවසීය.
Òසජිත් ප්‍රේමදාස ඇමැතිකම් කරන කාලේ සංස්කෘතික අරමුදලින් සල්ලි හොරකම් කළා යැයි චෝදනා කරපු ඩලස් අලහප්පෙරුම ඉන්නේ සජිත්ගේ ගාව. විල්පත්තු කැලේ කැපුවා කියල චෝදනා ලබපු රිෂාඩ් බදියුදීන් ඉන්නේ සජිත් ගාව. කවුරුහරි සජිත්ට ඡන්දය දෙන්න ඉන්නවා නම් ඒ අයට මේ කියන්නේ, විල්පත්තු කැලේ කපද්දී කෑගහපු චම්පික රණවක ඉන්නෙත් සජිත් ගාව. කැලේ කපපු හාදයත් ඉන්නවා. කැලේ කපනවට විරුද්ධ වුණ අයත් ඉන්නවා. ලංකාවේ ක්‍රිකට් විනාශ කළේ තිලංග සුමතිපාල. තිලංග ඉන්නකම් ක්‍රිකට් හදන්න බැරිය, තිලංග බුකීකාරයා රේස්කාරයා කියලා චෝදනා කරපු අර්ජුන රණතුංගත් ඉන්නේ සජිත් ගාව. තිලංග ඉන්නෙත් සජිත් ගාව. දෙන්නම එකට ඉන්නවා. ඕක අරුම පුදුම දෙයක් නෙවෙයි. මාලිමාවට විශාල ජනබලයක් හැදිලා හොරු පරාද කරගෙන ඉදිරියට යනකොට හොරු ටික බය වෙලා දැන් එක ගොඩකට ගොඩවෙලා. අරුන්දික කෑ ගහනවා යකෝ ගොඩවල් දෙකක ඉන්න එපා එක ගොඩකට එන්න කියලා. සජිත් මහත්තයා කෑගහනවා හොරු අල්ලනවා කියලා. හොරකම නතර කරන්න හොරකම් අල්ලන්න ඒ අයට පුළුවන්ද? ඒ ගොල්ලන් එකතු වෙලා තියෙන්නේ රට කාපු, රට විනාශ කරපු කණ්ඩායම් එක්ක. අපි ඡන්දෙ දුන්නේ අහවල් පක්ෂයට කියලා ආඩම්බරයෙන් කියන්න පුළුවන් පක්ෂය ජාතික ජන බලවේගය මාලිමාවයි. අපි මාලිමාවේ ආණ්ඩුවක් හදන්න ඕන ඇයි? අපි එකතු වෙලා තනතුරු බෙදා ගන්නද? නැහැ. මහජන ධනය හොරා කන්නේ නැති පාලනයක් හදන්න. ඒක හදන්න රනිල්ට, සජිත්ට බැහැ. හොරු ටික වටේ ඉන්නේ. අපි ගාව කවුරුත් නෑ වංචා, දූෂණ, හොරකම් කළ. අපි ගොඩක් කල් දේශපාලනය කරලා තියෙනවා. සත පහක්වත් හොරකම් කරලා නැහැ. අපට තනතුරු වරප්‍රසාද එපා. අපට ඕන මේ රට, ආර්ථිකය හදලා, අපේ දරුවෝ ඉගෙනගෙන රස්සාවක් කරලා සතුටින් ඉන්න එකයි. ඔවුන් සන්තෝසෙන් ජීවත් වෙන එකයි. ඒක දැකලා මැරෙන එක අපට සැපයි.”
