විදේශගත ශ්‍රමිකයන් පසුගිය අගෝස්තු මාසයේදී අමෙරිකානු ඩොලර් මිලියන 577.5ක් නීත්‍යනුකූලව බැංකු ක්‍රමය ඔස්සේ මෙරටට එවා ඇතැයි විදේශ රැකියා නියුක්ති කාර්යාංශය පවසයි.
පසුගිය වසරේ අගෝස්තු මාසය සමඟ සංසන්දනය කරන විට මේ වසරේ අගෝස්තු මාසයේදී මෙරටට එවා ඇති ප්‍රේෂණ ප්‍රමාණය සියයට 11කින් ඉහළ ගොස් තිබේ.
ජනාධිපති රනිල් වික්‍රමසිංහ මහතා රට භාරගෙන, විදේශ රැකියා ක්ෂේත්‍රය, මනූෂ නානායක්කාර මහතාට ලබාදුන් දිනයේ සිට විදේශගත ශ්‍රමිකයන් එවා ඇති මුදල් ප්‍රමාණය අමෙරිකානු ඩොලර් බිලියන 13.016 කි.
මේ වසර තුළදී පමණක් විදේශගත ශ්‍රමිකයන් ඩොලර් මිලියන 4288ක මුදලක් මෙරටට එවා ඇත.
තෙල් පෝලිම්, ගෑස් පෝලිම්, කිරිපිටි පෝලිම් නැති කර රටට අවශ්‍ය අත්‍යවශ්‍ය භාණ්ඩ ආනයනය කිරීම සඳහා මාසයකට ඩොලර් මිලියන 500ක් නීත්‍යනුකූල ක්‍රමය ඔස්සේ රටට ලබාදෙන ලෙසට ඉල්ලීම් කළ අතර එයට විදේශගත ශ්‍රමිකයන්ගෙන් යහපත් ප්‍රතිචාර හිමිව තිබුණි. පසුගිය වසරේ මාර්තු මාසයේ සිට විදේශගත ශ්‍රමිකයන් එවනු ලබන ප්‍රේෂණ ප්‍රමාණය ඩොලර් මිලියන 500 සීමාව ඉක්මවූ අතර පසුගිය මාස හතක කාලය පුරා අඛණ්ඩව ඩොලර් මිලියන 500 සීමාව ඉක්මවා යෑමට හැකියාව ලැබී තිබුණි.
