වසර 22ක් අඛණ්ඩව කිසිදු ටෙන්ඩර් කැඳවීමකින් තොරව එකම සමාගමක් විසින් එකක් ඩොලර් 5.89 බැගින් විදේශ ගමන් බලපත් මිලියන 11ක් මුද්‍රණය කර තිබෙන බවත්, ඊට වඩා අඩු මුදලකට ලබාගැනීමට හැකියාව තිබෙන නිසා මෙවර ඒ සඳහා ටෙන්ඩර් කැඳවූ බවත් අමාත්‍ය ටිරාන් අලස් මහතා පැවසීය. ඒ අනුව ඊපාස්පෝට් එකක් ඩොලර් 5.06කට ලබාගැනීමට හැකියාව තිබෙන බවද ඔහු ප්‍රකාශ කළේය. ඔහු මේ බව අනාවරණය කළේ මහනුවර ශ්‍රී දළදා මාලිගාවට ඊයේ (11) පැමිණි අවස්ථාවේ මාධ්‍ය හමුවේ අදහස් දක්වමිනි.
ඔහු එහිදී මෙසේද ප්‍රකාශ කළේය:
“පාස්පෝට් හා වීසා ගැටලුව විපක්ෂයේ මන්ත්‍රීවරුන් දේශපාලන වාසි ගන්න ඇති කරපු එකක්. සජිත් ප්‍රේමදාස මහත්තයා කියනවා එයා බලයට ආවම මේකට සම්බන්ධ අයට දඬුවම් කරනවා කියලා. වැරදි කරපු අයට දඬුවම් කරනවා නම් අපිත් ගොඩක් කැමතියි. ඒත් එයා සත්‍යය ඇති සැටියෙන්ම දැනගෙන නොවෙයි කතා කරන්නේ. තැරැව්කාර මාෆියාව විදේශ ගමන් බලපත්‍රයක් ලබාගන්න උදවු කිරීම සඳහා රුපියල් 50,000 සිට විවිධාකාරයෙන් මුදල් අය කළ බව අපට දැනගන්න ලැබුණා. ඒත් දැන් ඒවා ඔක්කොම නවත්තලා තියෙන්නේ. හැම ආගමන විගමන කාර්යාලයක් අසලම විශේෂ පොලිස් රාජකාරියක් ක්‍රියාත්මක වෙනවා. දැන් පෝලිම් නැහැ. අවුරුදු විසි දෙකක් විදේශ ගමන් බලපත්‍ර මුද්‍රණය කළේ එකම සමාගමක්. අඩුම වශයෙන් ටෙන්ඩර් කැඳවලාවත් නැහැ. ඒ අය මේ වන විට විදේශ ගමන් බලපත්‍ර මිලියන 11ක් මුද්‍රණය කර තිබෙනවා. මෙවරත් ඒ අයටම දෙන්න ගියාම මම ඒක නවත්තලා ටෙන්ඩර් කැඳවන්න කිවුවා. අලුතින් පාස්පෝට් ලැබෙන තෙක් යම් හිඟයක් තිබෙනවා. තිබෙන ටික කළමනාකරණය කරමින් බෙදාහරිනවා.
ජනාධිපතිවරණයෙන් පසු විදෙස්ගත වීමට වීසා ගැනීමේ කිසිදු අවශ්‍යතාවක් මට නැහැ. ලෝකයේ ඕනෑම රටක වසර 10ක කාලයක් ජීවත් වීමට විශේෂ වීසා බලපත්‍රයක් මට තිබෙනවා. ජනාධිපතිවරණයෙන් පසු විදේශගත වීම සඳහා රජයට සම්බන්ධ මැති ඇමතිවරු 80 දෙනකු මේ වන විට වීසා ගෙන ඇති බවට විපක්ෂයේ මන්ත්‍රීවරයකු සඳහන් කළා. මා හිතන විදිහට ඒක ඉතා අසත්‍ය ප්‍රකාශයක්. මැතිවරණ කාලයට එක එක අය එක එක කතා කියනවා. යම් ඇමැතිවරුන් වීසා ගත්තද කියන්න මා දන්නේ නැහැ. ඒත් මම එහෙම වීසා අරගෙන නැහැ. කාටවත් එහෙම රටින් පනින්න කිසිම අවශ්‍යතාවක් වෙන්නේ නැහැ. ජනපතිවරණය රනිල් වික්‍රමසිංහ මහතා අනිවාර්යයෙන්ම ජය ගන්නවා. ඒ ගැන සැකයක් නැහැ.”
