ප්‍රවීණ ලේඛක ජයන්ත විජේසිංහ මහතා විසින් රචිත “කුරාකුහුඹු මිනිසාගේ ජීවිතයේ හරස්කඩ” ග්‍රන්ථය, වත්තල සාන්ත අන්තෝනි මහ විදුහල් ශ්‍රවණාගාරයේදී සෙනසුරාදා (14) එළිදැක්වීමට නියමිතය.
ලේඛකයකු මෙන්ම පිරිස් පරිපාලකවරයකු හා කළමනාකාරවරයකු වන ජයන්ත විජේසිංහ මහතා තම ජීවිතයේ අත්විඳි සිද්ධි සහ චරිත පිළිබඳ කතා පෙළක් ලෙස මේ ග්‍රන්ථය රචනා කර තිබෙන අතර, එය සතුට, දුක, ආදරය වැනි පොදු මානුෂීය ගුණාංගවලින් සමන්විත වෙයි. මේ කෘතිය එළිදැක්වීමේ උත්සවය කැලණි කේබල්ස් සමාගමේ හිටපු කළමනාකාර අධ්‍යක්ෂ හා ෆැබ් ෆූඩ්ස් කළමනාකාර අධ්‍යක්ෂ හේමන්ත පෙරේරා මහතාගේ ප්‍රධානත්වයෙන් පැවැත්වෙන අතර, කොළඹ විවෘත විශ්වවිද්‍යාලයේ කළමනාකරණ පීඨයේ පීඨාධිපති මහාචාර්ය නලින් අබේසේකර, කොළඹ විශ්වවිද්‍යාලයේ සිංහල අධ්‍යයනාංශයේ මහාචාර්ය සරත් විජේසූරිය, කලාකරු ජයන්ත චන්ද්‍රසිරි මහත්වරු දේශන පවත්වති.
