ජාතික ජන බලවේගයේ පාර්ලිමේන්තු මන්ත්‍රිනි හරිනි අමරසූරිය මහත්මියගේ කීර්තිනාමයට හානි වන ආකාරයේ අපහාසාත්මක හා අසත්‍ය ප්‍රකාශයක් කිරීම සම්බන්ධයෙන් සමගි ජන බලවේගයේ ජාතික සංවිධායක, පාර්ලිමේන්තු මන්ත්‍රී තිස්ස අත්තනායක මහතාට එරෙහිව රුපියල් මිලියන 100ක වන්දියක් ඉල්ලා කොළඹ දිසා අධිකරණය ඉදිරියේ ඊයේ (11) අපහාස නඩුවක් ගොනු කර ඇත. ජනාධිපතිවරණයට සමගි ජන බලවේගය නියෝජනය කරමින් තරග වදින සජිත් ප්‍රේමදාස මහතාට සහාය පළ කරමින් පසුගිය අගෝස්තු 19 වැනිදා මාවනැල්ලේ පැවැති රැස්වීමකදී කළ අසත්‍ය හා ද්වේෂසහගත ප්‍රකාශයක් සම්බන්ධයෙන් මෙම නඩු පැවරීම සිදු කර තිබේ.
වගඋත්තරකරු මහනුවර ඇසළ පෙරහර නවත්වන බවට පෙත්සම්කාරිය ප්‍රකාශ කළේ යැයි අසත්‍ය තොරතුරක් සමාජගත කර ඇති බව සඳහන් කර ඇති බවත් බෞද්ධ පරිසරයක කුඩා කල සිටම හැදී වැඩුණු සිය සේවාදායිකාව දකුණු ප්‍රදේශයේ බොහෝ විහාරස්ථානවලට ඉඩකඩම් පරිත්‍යාග කළ පවුලකින් පැවත එන තැනැත්තියක් බවත් ඇය කිසිදු අවස්ථාවක මොනයම් හෝ ආගමකට අපහාස වන ආකාරයේ ප්‍රකාශ කර නැති තැනැත්තියක බවත් ලේඛනගත නීතිඥ ශානිකා සිල්වා මහත්මිය ගොනු කළ පැමිණිල්ලේ සඳහන්වේ. විශ්වවිද්‍යාල ආචාර්යවරියක හා දේශපාලන ක්‍රියාධරයකු ලෙස හරිනි අමරසූරිය මහත්මිය ගොඩනඟාගෙන ඇති කීර්තිනාමයට හානි වන ආකාරයේ ද්වේෂසහගත ප්‍රකාශයක් කිරීම සම්බන්ධයෙන් වගඋත්තරකරුගෙන් හා එය විකාශය කළ පෞද්ගලික මාධ්‍ය නාළිකාවකින් රුපියල් මිලියන 100 බැගින් වන්දි ඉල්ලා මෙම නඩුව පවරා තිබේ.
