විදේශ විනිමය පාලකට නොදන්වා වංචාසහගත ලෙස අමෙරිකානු ඩොලර් ලක්ෂ 20කට ආසන්න ප්‍රමාණයක් උන්ඩියල් ක්‍රමයට ගෙන්වා ඒ මඟින් භාණ්ඩ ආනයනය කිරීමේ චෝදනා 218කට වරද පිළිගත් කොළඹ පිටකොටුවේ ආනයනකරුවන් දෙදෙනකුට කොළඹ මහාධිකරණ විනිසුරු නවරත්න මාරසිංහ මහතා ඊයේ (05) රුපියල් 21,90,000ක දඩයක් නියම කළේය.
පළමු විත්තිකරුට එරෙහිව පළමු අධිචෝදනාව ඇතුළු චෝදනා 49ක් ඉදිරිපත් කර තිබූ අතර දෙවැනි විත්තිකරුට පළමු අධිචෝදනාවට අමතරව තවත් චෝදනා 169ක් ගොනු කර තිබිණි. මහාධිකරණ විනිසුරුවරයා විත්තිකරුවන්ට එක් චෝදනාවකට රුපියල් 10,000 බැගින් දඩ නියම කර එය නොගෙවන්නේ නම් එක් චෝදනාවකට මාස 6 බැගින් ලිහිල් සිරදඬුවම් නියම කර දඩ මුදල ගෙවන තෙක් ආගමන විගමන බලපත්‍රය අධිකරණය භාරයේ රඳවා ගැනීමට නියම කළේය.
දශක 6කට ආසන්න කාලයක් විදේශයන්ගෙන් භාණ්ඩ ආනයනය කර ඇති විත්තිකරුවන් භාණ්ඩ ආනයනය සම්බන්ධ නීති හා රෙගුලාසි නොදන්නා පුද්ගලයන් විය නොහැකි බවත් ඔවුන් රේගු විධිවිධාන ගැන මනා වැටහීමක් ඇති තැනැත්තන් වන බවත් අධිකරණය නිගමනය කළේය. එහෙත් විත්තිකරුවන් ආරම්භක අවස්ථාවේදීම වරද පිළිගැනීම, නඩු විභාගයට යොමු වූයේ නම් එල්ලව ඇති චෝදනා ප්‍රමාණය සහ විමර්ශන‍යට ගතවන කාලය සැලක්ලිලට ගැනීම, විත්තිකරුවන්ගේ වයෝවෘද්ධභාවය, පෙර වැරැදි නොතිබීම යන කරුණු සැලකිල්ලට ගෙන සක්‍රිය සිරදඬුවම් නියම නොකරන බව ප්‍රකාශ කළ විනිසුරුවරයා ඉදිරි කාලය යහපත් ලෙස ගත කරන ලෙස අවවාද කළේය. නීතිඥ රුෂ්ඩි හබීබ්, නීතිඥ සංදීප ගමඇතිගේ විත්තිකරුවන් වෙනුවෙන් පෙනී සිටියේය.
