කොහුවල සරණංකර පොලිස් මුරපොළ මතට අසල බෝ ගසක විශාල අතු කීපයක් එක්වර කඩා වැටීමෙන් මුරපොළ ඇතුළු දේපළ රැසකට රුපියල් ලක්ෂ ගණනාවක අලාභයක් සිදු වී ඇතැයි කොහුවල පොලිසිය පවසයි. ඊයේ (28) පෙරවරු 10ට පමණ මෙම අනතුර සිදු වී ඇති අතර අනතුරින් කිසිවෙකුටත් තුවාල සිදුවී නොමැත.
බෝ ගසේ අතු කඩා වැටීමෙන් මුරපොළේ ස්ථානාධිපතිවරයාගේ විවේක කාමරය, පොලිස් විවේකාගාරය, භෝජනාගාරයට බරපතළ අලාභ සිදු වී මුළු ගොඩනැඟිල්ලම දෙදරුම් කා විශාල අලාභයක් සිදුවී ඇති අතර වෝල්ට් 33000 විදුලි සැපයුම මෙන්ම සාමාන්‍ය විදුලි සැපයුම, දුරකතන සහ භූගත රූපවාහිනී කේබල් සැපයුම සම්බන්ධ වන විදුලි කණු ඇතුළු කේබල් විශාල ප්‍රමාණයකට ලක්ෂ ගණනාවක අලාභයක් සිදුවී ඇති අතර ඇළ මාර්ගය අසල තිබූ ත්‍රිරෝද රථයකට සහ කුඩා වෙ‍ෙළඳසලකට ද දැඩි අලාභ සිදුවී තිබෙන බව ආරංචි මාර්ග පවසයි. මෙම ගසෙහි ඇති අනාරක්ෂිතභාවය සම්බන්ධයෙන් දෙහිවල ගල්කිස්ස නගර සභාවේ නාගරික කොමසාරිස්වරයා වෙත පසුගිය 21දා ලිඛිතව දැනුම් දීමට කොහුවල පොලිසිය කටයුතු කර ඇතත් ඊයේ (28) අනතුර වන අවස්ථාව දක්වා ඒ සම්බන්ධයෙන් පියවරක් ගැනීමට කටයුතු නොකිරීම හේතුවෙන් මෙම අනතුර වූ බව පොලිස් ආරංචි මාර්ග සඳහන් කරයි.
මෙම අනතුරත් සමඟම ප්‍රදේශය පුරා විදුලිය විසන්ධි වූ අතර කොහුවල සරණංකර හා පාමංකඩ පාර සම්පූර්ණයෙන්ම වසා දැමිණි. එම මාර්ගයේ ගමන් ගැනීමට නියමිත වාහන විකල්ප මාර්ග ඔස්සේ යැවීමට කොහුවල පොලිසියේ රථ වාහන අංශයේ නිලධාරීන් විසින් කටයුතු කරනු දක්නට ලැබිණි. මේ පිළිබඳ දෙහිවල ගල්කිස්ස නගර සභාවේ නාගරික කොමසාරිස් චන්දන මාන්නප්පෙරුම මහතාගේ විමසීමේදී මෙසේ පැවසීය.
‘විශාල ගස්වල අතු කැපීමට යොදා ගන්නා යන්ත්‍රය කාලයක සිට අක්‍රියයි. ඒවායේ අමතර කොටස් සොයා ගැනීමට නොහැකිවීම හේතුවෙන් එය යථා තත්ත්වයට පත් කර ගැනීමට නොහැකි වී තිබෙනවා. ඒ වගේම ගස්වල අතු ඉවත්කිරීමට ටෙන්ඩර් කළත් ඒවට කවුරුත් ඉදිරිපත් වන්නේ නෑ.’
