අයිස් මත්ද්‍රව්‍ය කිලෝග්‍රෑම් 30ක් ශ්‍රී ලංකාවට ආනයනය හා ජාවාරම් කිරීමට ආධාර අනුබල දුන්නැයි පොලිස් මත්ද්‍රව්‍ය නාශක කාර්යාංශය අත්අඩංගුවට ගත් පෞද්ගලික ආයතනයක සේවකයකු ලබන 2දා දක්වා රක්ෂිත බන්ධනාගාරගත කරන ලෙස කොළඹ අතිරේක මහේස්ත්‍රාත් පවිත්‍රා සංජීවනී පතිරණ මහත්මිය ඊයේ (28) නියෝග කළේය.
මෙලෙස රක්ෂිත බන්ධනාගාරගත කරනු ලැබුවේ කිරිබත්ගොඩ ප්‍රදේශයේ පදිංචි පෞද්ගලික ආයතනයක සේවය කරනු ලැබූ දැකුම්පිටිය ආචාරිගේ පසිඳු කෞශල්‍ය දැකුම්පිටිය යන සැකකරුය.
පොලිස් මත්ද්‍රව්‍ය කාර්යාංශයට ලද පැමිණිල්ලකට අනුව විමර්ශන කටයුතු කිරීමේදී මෙම සැකකරු සිය රාජකාරියට පරිබාහිරව මත්ද්‍රව්‍ය ජාවාරම් කටයුතුවල නියැළෙන බවටද පොලිසිය අධිකරණයට කරුණු දැක්වීය.
මෙම සිද්ධියට අදාළව විමර්ශන කටයුතු තවදුරටත් කිරීමට අවශ්‍ය බවද පොලිස් මත්ද්‍රව්‍ය කාර්යාංශය අධිකරණයට දැනුම් දුන්නේය.
ඒ අනුව ඉදිරිපත් වූ කරුණු සැලකිල්ලට ගත් අධිකරණය සැකකරු ලබන 2 දා දක්වා රක්ෂිත බන්ධනාගාරගත කරන ලෙස නියෝග
කළේය.
