සේවා නිවාඩු ලබාගෙන අධිවේගී මාර්ගයේ බස් රථයකින් නිවෙසට යමින් සිටී පොලිස් විශේෂ කාර්ය බළකායේ පොලිස් කොස්තාපල්වරයෙකු එම බස් රථයේ ගමන් කරමින් සිටි කාන්තාවකට ලිංගික හිංසන කිරීම සම්බන්ධයෙන් අක්මීමන පොලිස් ස්ථානයේ නිලධාරීන් විසින් පෙරේදා (26) අත්අඩංගුවට ගෙන තිබේ.
මෙම පොලිස් විශේෂ කාර්ය බළකායේ පොලිස් කොස්තාපල්වරයා සේවා නිවාඩු ලබාගෙන කඩුවෙල සිට ගාල්ල බලා තම නි‍ෙවසට යාමට අධිවේගී මාර්ගයේ ගමන් ගන්නා බස් රථයකට නැඟ තිබේ. පසුව ඔහු අසුන්ගෙන සිටී අසුනට ඉදිරි අසුනේ සිටි කාන්තාවකට ලිංගික බලපෑම් කරමින් හැසිර තිබේ. එම අවස්ථාවේදී එම කාන්තාව සිය ජංගම දුරකතනයෙන් ඒවා පටිගත කර ගනිමින් පින්නදූව පොලිස් මුරපොළට මේ බව දන්වා ඇත.
අනතුරුව පින්නදුව පොලිස් මුරපොළේදී මෙම පොලිස් කොස්තාපල්වරයා අත්අඩංගුවට ගෙන අක්මීමන පොලිස් ස්ථානයට භාරදී ඇත. සැකකරු ඊයේ (27) අධිකරණයට ඉදිරිපත් කිරීමෙන් අනතුරුව ලබන මස 04 වෙනිදා දක්වා රක්ෂිත බන්ධනාගාරගත කර තිබේ.
සිද්ධිය සම්බන්ධයෙන් අක්මීමන පොලිසිය වැඩිදුර විමර්ශන සිදු කරයි.
