එක්ස්ප්‍රස් පර්ල් නෞකාව ගිනි ගැනීමේ සිද්ධිය සම්බන්ධයෙන් ගොනුකර තිබෙන නඩුව විභාගයට ගැනීම අත්හිටුවා ශ්‍රේෂ්ඨාධිකරණය නිකුත් කළ අතුරු තහනම් නියෝගයේ පිටපතක් ඉදිරිපත් කර නැති බැවින් නෞකාවේ කපිතාන්වරයාගේ වීසා දීර්ඝ කිරීම සම්බන්ධයෙන් නියෝගයක් නිකුත් කළ නොහැකි බවට කොළඹ මහාධිකරණය ඊයේ (28) ප්‍රකාශ කර සිටියේය.
කොළඹ වරායට ආසන්න මුහුදු තීරයේ දී එක්ස්ප්‍රස් පර්ල් නෞකාව ගිනිබත් වීමෙන් සමුද්‍ර දූෂණයක් සිදු කළ බවට චෝදනා කර නීතිපතිවරයා විසින් පවරා ඇති නඩුවක් විභාගයට ගත් අවස්ථාවේ මහාධිකරණ විනිසුරු සුජීව නිශ්ශංක මහතා මෙසේ ප්‍රකාශ කර සිටියේය.
නඩුවේ පළමු විත්තිකරු වන එක්ස්ප්‍රස් පර්ල් නෞකාවේ කපිතාන්වරයා වන ටියුට්කාලෝ විටැලි නමැති රුසියන් ජාතිකයාට මෙරට රැඳී සිටීමට අවසර දී ඇති වීසා කාලය ඉකුත්ව ඇති බැවින් එය දීර්ඝ කරන නියෝගයක් ආගමන විගමන පාලකවරයා නිකුත් කරන ලෙස ඉල්ලා ගොනු කළ මෝසමකට අනුව ඊයේ (28) නඩුව කැඳවිණ.
නියෝජ්‍ය සොලිස්ටර් ජනරාල් මාධව තෙන්නකෝන් මහතා නීතිපතිවරයා වෙනුවෙන් කරුණු දක්වමින් මහාධිකරණ නඩුවේ චෝදනා නීති විරෝධී බව දක්වා විත්තිකරුවන් ශ්‍රේෂ්ඨාධිකරණයට අභියාචනා පෙත්සමක් ඉදිරිපත්ව ඇති බව දන්වා සිටියේය. එක්ස්ප්‍රස් පර්ල් නෞකාවේ දේශීය නියෝජිත සමාගම වූ සී කොන්සෝටියම් ලංකා සමාගමේ අධ්‍යක්ෂවරුන් සහ කපිතාන්වරයා ගොනු කළ එම අභියාචනා පෙත්සම විභාගයට ගැනීමට ශ්‍රේෂ්ඨාධිකරණය නියෝග කර ඇත. එම ඉල්ලීම පිළිගනිමින් නිකුත් කළ අතුරු තහනම් නියෝගය අනුව මහාධිකරණ නඩුව විභාග කළ නොහැකි බැවින් විත්තිය ඉල්ලා සිටින ආකාරයේ නියෝගයක් නිකුත් කළ නොහැකි බව කියා සිටියේය.
ශ්‍රේෂ්ඨාධිකරණය විසින් අත්හිටුවා ඇත්තේ නඩු විභාගය පමණක් බවත් ඒහා සම්බන්ධ අනෙකුත් නියෝග නිකුත් කළ හැකි බවටත් විත්තිය කරුණු දක්වා සිටියේය. එම නියෝගය සම්බන්ධයේ පිටපතක් මෝසම සමඟ මහාධිකරණයට වාර්තා කර නැති බැවින් ඉල්ලා සිටින නියෝගය නිකුත් කිරීම පසුවට කල් තබන බව අධිකරණය දන්වා සිටියේය.
මේ අතර නඩුවේ 3 වැනි විත්තිකරු වන නෞකාවේ දේශීය නියෝජිත සමාගම වන සී කොන්සෝටියම් ලංකා සමාගමේ අධ්‍යක්ෂවරයකු වන අර්ජුන ඉන්ද්‍රජිත් තිසේරා හෙට්ටිආරච්චිට එරෙහිව පනවා ඇති ගුවන් ගමන් තහනම ඉවත් කරන ලෙස ඉදිරිපත් වූ ඉල්ලීමකට ද නියෝජ්‍ය සොලිස්ටර් ජනරාල්වරයා විරුද්ධත්වය ප්‍රකාශ කළේය.
මෙරට මුහුදු තීරයේදී ගිනිගත් නෞකාව මඟින් දේශීය ජල තීරයට බරපතළ හානියක් සිදු කිරීම සම්බන්ධයෙන්, සමුද්‍ර දූෂණය වැළැක්වීමේ පනත යටතේ අධි චෝදනා අටක් යටතේ නීතිපතිවරයා මේ නඩුව පවරා ඇත. නියෝජ්‍ය සොලිස්ටර් ජනරාල් මාධව තෙන්නකෝන් මහතා නීතිපතිවරයා වෙනුවෙන් මෙම නඩුවට පෙනී සිටි අතර විත්තිය වෙනුවෙන් දහම් සිරිවර්ධන, ෂෙන් පෝස්ටර්, නිරංජන් ද සිල්වා, නිපුණි විමලසේන යන නිතිඥ මහත්ම මහත්මීන් සමඟ ජනාධිපති නීතිඥ අනුර මැද්දෙගොඩ මහතා පෙනී සිටියේය.
