යාපනයේ සිට මුහුදු ගිය ධීවරයන් සිව් දෙනකු රැගත් බෝට්ටුවක් ක්‍රියා විරහිත වීම නිසා ඒ බෝට්ටුව ඉන්දියාවේ චෙන්නායි මුහුදු වෙරළට පා වී ගොස් තිබියදී ධීවරයින් හා බෝට්ටුව චෙන්නායි වෙරළාරක්ෂක නිලධාරීන් විසින් පෙරේදා (27) අත්අඩංගුවට ගෙන තිබේ.
මෙසේ අත්අඩංගුවට පත්ව ඇත්තේ යාපනයෙන් මුහුදු ගිය 57 හැවිරිදි අරුලානන්තසාමි රාමක්‍රිෂ්ණන්, 64 හැවිරිදි මුස්තායින්, 61 හැවිරිදි නර්කුනම් ගුණපාලසිංහම් සහ ත්‍රිකුණාමලයේ පදිංචි 62 හැවිරිදි ප්‍රේම් යන ධීවරයෝ හතර දෙනාය. මේ ධීවර පිරිස යාන්ත්‍රික දෝෂයක් නිසා තම බෝට්ටුව පා වී ගිය බව එහිදී ප්‍රකාශ කොට ඇතත් චෙන්නායි පොලිසිය ප්‍රශ්න කොට අවසන් තීරණයකට එළඹෙන තුරු ඔවුන් චෙන්නායි වෙරළාරක්ෂක පොලිසියේ රඳවාගෙන තිබේ.
මේ පිළිබඳ යාපනයේ ධීවර සංගම් හා අත්අඩංගුවට පත් ධීවරයන්ගේ ඥාතීන් යාපනයේ පිහිටි නියෝජ්‍ය ඉන්දීය කොන්සෝල් කාර්යාලයට දැනුම් දී, ඔවුන් නිදහස් කිරීමට මැදිහත් වන ලෙස ඉල්ලා තිබේ. කෙසේ වෙතත් මේ සම්බන්ධයෙන් චෙන්නායි ධීවර අමාත්‍යාංශය ප්‍රකාශ කර ඇත්තේ මේ ධීවරයන්ගේ යාත්‍රාවේ දෝෂයක් සිදුව ඇත් නම් ඔවුන් බන්ධනාගාරගත නොකොට නිදහස් කිරීමට පියවර ගන්නා බවයි.
