*සාධාරණ සමාජයක් සඳහා වූ ජාතික ව්‍යාපාරය කියන්නේ දේශපාලනය වෙත ප්‍රබල මැදහත් වීමක් කළ බලපෑමක් කණ්ඩායමක්, ඔබ සංවිධානයේ වත්මන් මැදහත් වීම සහ ක්‍රියාකාරිත්වය පිළිබඳව පැහැදිලි කිරීමක් කළ හැකිද?
සාධාරණ සමාජයක් සඳහා වූ ජාතික ව්‍යාපාර ආරම්භ කරනු ලබන්නේ 2012 වර්ෂයේදීයි. ඒ සඳහා මූලිකත්වය ගෙන කටයුතු කළේ අපවත් වී වදාළ 
මාදුළුවාවේ සෝභිත නාහිමි විසිනුයි. නිශ්චිත අරමුණක් ඇතිවයි අප මෙම සංවිධානය බිහි කළේ. අප එදා සිටම ඒ නිශ්චිත අරමුණු ඇතිවයි කටයුතු කරන්නේ. අප සංවිධානය විධායක ජනාධිපති ධුරය අහෝසි කළ යුතුය යන අරමුණ සහ ඉලක්කය සහිතවයි. ඒ වගේම මැතිවරණ ක්‍රමය පිළිබඳවත් අවධානය යොමු කරනු ලැබුවා. අප එදා සිටම මේ අරමුණ සහ ඉලක්කය සඳහායි කටයුතු කරනු ලැබුවේ. අප පක්ෂ දේශපාලනය වෙනුවෙන් පෙනී සිටිනු ලබන සංවිධානයක් නොවෙයි. අප 2012 වර්ෂයේ සිටම මෙම නිශ්චිත අරමුණු පෙරදැරි කරගෙන තමයි කටයුතු කරනු ලබන්නේ. අද වන විට රට පත්ව තිබෙන තත්ත්වයට මූලිකව බලපානු ලැබූ කරුණු අතර, මෙම කරුණු මූලිකව තිබෙනවා. මෙම දේශපාලන ක්‍රමය ප්‍රතිසංස්කරණය විය යුතුයි කියන ස්ථාවරයේ තමයි අප එදා සිට අද දක්වා සිටින්නේ.
ඒ නිසා අප මේ අරමුණ ජය ගැනීම සඳහා කටයුතු කරනු ලබනවා.
* මාදුළුවාවේ සෝභිත හිමියන්ගේ අපවත් වීම සමඟ සාධාරණ සමාජයක් සඳහා ජාතික ව්‍යාපාරයේ කටයුතු සිදු කිරීම ප්‍රතිසංස්කරණය වුණේ කොහොමද?
අපේ සංවිධනය නිශ්චිත අරමුණු ඇතිව කටයුතු කළ සංවිධානයක් විදිහට උන්වහන්සේගේ නායකත්වය සහ මෙහෙයවීම ලොකු ශක්තියක් වුණා. උන්වහන්සේගේ අපවත් වීම සමඟ උන්වහන්සේ සමඟ කටයුතු කළ පිරිස් තීරණය කළා සංවිධානයේ අරමුණු දීර්ඝ කාලීනවා ඉදිරියට රැගෙන යාමට. ඒ අනුව අප මේ සංවිධානය සාධාරණ සමාජයක් ඇති කිරීමේ අරමුණ පෙරදැරි කරගෙන ඉදිරියටත් කටයුතු කරනු ලබනවා. ඒ සඳහා වූ වැඩපිළිවෙළක් අනුව තමයි අප කටයුතු කරනු ලබන්නේ.
l 2015 ජනාධිපතිවරණයේදී තීරණාත්මක කාර්යභාරය සිදු කරනු ලැබූ ප්‍රධානම සිවිල් සංවිධානය වූයේ සාධාරණ සමාජයක් සඳහා ජාතික ව්‍යාපාරයයි. දැන් නැවත රට තීරණාත්මක තැනකට ඇවිත්, තව දින කිහිපයකින් ජනාධිපතිවරණය පවත්වනු ලබනවා. මේ සඳහා ප්‍රධාන පාර්ශ්ව තුනක් තරගයට එළඹ සිටිනවා. මේ තරගකරුවන් සහ ඔවුන් නියෝජනය කරනු ලබන පක්ෂ සහ කණ්ඩායම්වලට ඔබ සංවිධානය දක්වනු ලබන ප්‍රතිචාරය කුමක්ද?
අප කිසිදු දේශපාලන මතයකට හෝ පක්ෂයකට බරව කටයුතු කරනු ලබන පිරිසක් නොවෙයි. ඒත් අපට සමාජ වගකීමක් තිබෙනවා ජනතාව වෙනුවෙන් කැපවීම සහ ඒ සඳහා වූ නැඹුරුතාවය වෙනුවෙන්. ඒක අපේ වගකීමක් විදිහටයි අප සලකනු ලබන්නේ. ඒ වගකීම වෙනුවෙන් අප තරග කරනු ලබන සියලු ජනාධිපති ධුර අපේක්ෂයන් වෙත ප්‍රශ්න දහයකින් යුතු ප්‍රශ්නාවලියක් යොමු කර තිබෙනවා. ඔවුන් එම ප්‍රශ්නාවලියට ලබා දෙනු ලබන ප්‍රතිචාරය අනුව ඡන්ද දායකයාට නිසි අවබෝධයක් ලබා ගැනීමට පුළුවන්කම ලැබෙනවා තමන් ඡන්දය ලබා දිය යුත්තේ කාටද යන්න පිළිබඳව. ප්‍රශ්නාවලියට පිළිතුරු ලැබුණු විට අප එය ප්‍රසිද්ධ කිරීමට කටයුතු කරනු ලබනවා. ඒ ප්‍රශ්නාවලියට ලැබෙන පිළිතුරු අනුව ඡන්ද දායකයාට තේරුම් ගන්න පුළුවන් මේ අපේක්ෂකයන්ගේ වැඩපිළිවෙළ ප්‍රායෝගිකද? කෙතරම් ජනතා හිතකාමීද? කෙතෙක් දුරට සාධාරණද කියලා අප මේ විදිහේ ප්‍රශ්නාවලියක් යොමු කරනු ලැබුවේම මේ කාර්ය සඳහායි.
මේ විදිහට ඔබ සංවිධානය විසින් යොමු කළ ප්‍රශ්නාවලිය සහ එහි අන්තර්ගතය පිළිබඳව සඳහන් කළ හැකිද?
අප තරමක් දිග ප්‍රශ්නාවලියක් ජනාධිපති අපේක්ෂකයන් වෙත යොමු කරනු ලැබුවේ. ඒ නිසා මෙම ප්‍රශ්න දහයේ ප්‍රශ්නාවලිය පිළිබඳව ඇතුළත් මූලික කරුණු රාමුව ඉදිරිපත් කරනු ලබන්නම්. එනම්, මැතිවරණ ප්‍රකාශනවල ඇතුළත් කළ යුතු කරුණු පිළිබඳව සාරාංශයක්.
ඒ අතර ආණ්ඩුකරණය, ආර්ථිකය, නීතිය සහ සාමය, විදේශ ප්‍රතිපත්තිය, ජාතික ආරක්ෂාව පිළිබඳ ප්‍රතිපත්තිය පිළිබඳව, අධ්‍යාපනය, සෞඛ්‍ය, පරිසරය, ආදිය ඇතුළත්ව තිබෙනවා. එමෙන්ම ආණ්ඩුකරණය, නීතියේ ආධිපත්‍ය, විදේශ ප්‍රතිපත්තිය, මාධ්‍ය, සමාජ හැසිරීම ඇතුළු කරුණුද මෙම ප්‍රශ්නාවලිය වෙත ඇතුළත්ව තිබෙනවා.
*සාධාරණ සමාජයක් සඳහා ජාතික ව්‍යාපාරය ආරම්භ කිරීමේ මූලික පරමාර්ථය වූයේ විධායක ජනාධිපති ධුරය අවසාන කිරීම සහ අලුත් ආණ්ඩුක්‍රම ව්‍යවස්ථාවක් සම්පාදනය කිරීමයි. දැන් ඔබේ අරමුණු වෙනස් වෙලාද?
නැහැ, මම ආරම්භයේදී සඳහන් කළ ආකාරයට අපේ නිශ්චිත ප්‍රතිපත්ති සහ අරමුණු කිසිසේත්ම වෙනස් වෙලා නැහැ. අප අදත් දරන්නේ මැතිවරණ ක්‍රමය වෙනස් විය යුතුයි විධායක ජනාධිපති ධුරය වෙනස් විය යුතුයැයි කියන මතයයි. අප ඒ වෙනුවෙන් අදත් පෙනී සිටිනු ලබනවා.
* ඔබ ඇතුළු කණ්ඩායම් විධායක ජනාධිපති ධුරය අහෝසි කළ යුතු බවට දිගින් දිගටම තර්ක කළත් විධායක ජනාධිපති ධුරයට පක්ෂපාතී කණ්ඩායම් කියනු ලබන්නේ විධායක ජනාධිපති ධුරය නොමැති නම් ඇතිව තිබූ ආර්ථික අර්බුදය විසඳීමට හෝ තිස් අවුරුදු යුද්ධය නිමා කිරීමට හැකියාවක් නොලැබෙන බවයි. මේ තර්කය ගැන ඔබේ අදහස මොකක්ද?
ඒ තර්කවල කිසිදු පදනමක් නැහැ. අපේ රට මුහුණ දුන් ප්‍රධානම ගැටලුවලට හේතු සාධකය බවට පත් වුණේ අන් කිසිවක් නොවෙයි විධායක ජනාධිපති ධුරයේ අත්තනෝමතික ක්‍රියාකාරිත්වය. යුද්ධය ඇතිවීම සහ එය උග්‍ර වීමට විධායක ජනාධිපති ධුරයේ ක්‍රියාකාරීත්වය බලපානු ලැබුවා. ඒ වගේම ආර්ථික අර්බුදය ඇති වීමේදීත් විධායක ජනාධිපති ධුරය බලපානු ලැබුවා. එය මම කියන දෙයක් නොවෙයි, උසාවිය විසින් නිගමනය කළා ඇතිව තිබෙන ආර්ථික අර්බුදයට කවුද වගකියන්න ඕනෑ කියලා. එහිදී ඒ ආර්ථික අර්බුදයේ ප්‍රධාන චූදිතයකු බවට පත්වනු ලැබුවා හිටපු ජනාධිපතිවරු දෙදෙනකුත්. එයින්ම අපට නිගමනය කරන්න පුළුවන්කම තිබෙනවා. යුද්ධය නිමා කිරීමේ ගෞරවය මහින්ද රාජපක්ෂ මහතාට පමණක් ලබාදීම වැරැදියි. එදා යුද්ධය ජය ගත්තේ සාමූහික ව්‍යායාමයකින්. එහිදී සේනාධිනායකයා විදිහට ඔහු කටයුතු කළා.
යුද්ධය සම්බන්ධව කතා කරද්දී විධායක ජනාධිපතිවරයකු අවශ්‍ය බව සඳහන් කිරීමේ තර්කය පහසුවෙන් බිඳෙන තර්කයක්. උදාහරණයකට ඊශ්‍රායලය ගනිමු. එම රට හොඳට හෝ නරකට සාර්ථක ලෙස යුද්ධය මෙහෙයවනු ලබනවා. එහි තිබෙන්නේ අගමැති මූලික කරගත් පාර්ලිමේන්තු ක්‍රමයක්. ඉන්දියාව යුදමය අතින් මෙන්ම ආර්ථික අතින්ද ලොකු සාර්ථකත්වයක් අත්පත් කරගත් ආසියාවේ නැඟී එන රාජ්‍යක්. ඒ රාජ්‍ය පවා පාලනය කරනු ලබන්නේ විධායක ජනාධිපති ධුරය මූලික කරගත් ආණ්ඩු ක්‍රමයකින් නොවෙයි. අගමැති මූලික කරගත් පාර්ලිමේන්තු ප්‍රජාතන්ත්‍රවාදී ක්‍රමයකටයි. ඒ නිසා විධායක ජනාධිපති ධුරය නැතිව බෑ කියා කියන අදහස බැහැර කිරීමට පුළුවන්.
* මෙහිදී තවත් පිරිසක් සඳහන් කරනු ලබන තර්කයක් බවට පත්ව තිබෙන්නේ 13 වන ව්‍යවස්ථාව, පළාත් සභා ක්‍රමය තිබීම නිසා මධ්‍යගත පාලනය ආරක්ෂා කර ගැනීම සඳහා විධායක ජනාධිපති ධුරය අවශ්‍ය බවයි. ඒ ගැන ඔබේ අදහස කුමක්ද?
එයද ඉන්දියාව උදාහරණය විදිහට ගැනීමෙන්ම මේ තර්කය බිඳ දමන්න පුළුවන්. ඇත්තෙන්ම ඉන්දියාව කියන්නේ විවිධ ජනවර්ග විවිධ ජන විවිධත්ව තිබෙන රාජ්‍යයක්. එහි තිබෙන ප්‍රාන්ත රාජ්‍යවලට අපේ පළාත් සභාවලට වඩා වැඩි බලතල තිබෙනවා. එහෙත් ඒ සියලු දේ තිබුණද අවුරුදු හැත්තෑ හයක් එම රට තුළ මේ ප්‍රාන්ත රාජ්‍ය සහ මධ්‍යම ආණ්ඩුව අතර ගැටලුවක් ඇති වුණේ නැහැ.
*අපේ රට පසුගිය කාලයේදී විශාල ආර්ථික අර්බුදයකට ලක් වුණා. ඒ ආර්ථික අර්බුදය පූර්ණ ලෙස විසඳී නැතත් යම් ස්ථාවර තත්ත්තයකට පත්ව තිබෙනවා. මෙම ස්ථාවරභාවය තවදුරටත් පවත්වා ගැනීමත් ඉදිරියට තව දුරටත් වර්ධනය කර ගැනීමටත් අවශ්‍යයි. ඉදිරියේදී පැවැත්වෙන මැතිවරණවලින් පසු මෙම ආර්ථික ක්‍රියාවලියේ වෙනසක් සිදු වුණොත් ඇති විය හැකි තත්ත්වය කුමන මුහුණුවරක් ගනීවිද?
මැතිවරණ පැවැත්වීම හොඳයි. එහිදී ජනතා පරමාධිපත්‍යයට අවශ්‍ය තැන ලැබෙනවා. ඇත්තෙන්ම නීරෝගි ප්‍රජාතන්ත්‍රවාදයක් තිබෙන අප වැනි රටකට ප්‍රජාතන්ත්‍රවාදී මැතිවරණ අවශ්‍යම සාධකයක් විදිහට හඳුන්වා දීමේ වරදක් නැහැ. ජනමතය අනුව අලුත් ආණ්ඩු එන්නත් පුළුවන්, තිබෙන ආණ්ඩුව දිගටම තිබෙන්නත් පුළුවන්. බහුතර ප්‍රජාතන්ත්‍රවාදය වගේම ජනමතය කියන්නේ එයයි. එහෙත් එක් දෙයක් තිබෙනවා. අද අපේ රට ආර්ථික වශයෙන් යම් කිසි මාර්ගයකට අවතීරණ වෙලා තිබෙන්නේ. එහි සාර්ථකත්වයක් දක්නට තිබෙනවා. එහෙත් කවුරුන් හෝ කණ්ඩායමක් මේ ක්‍රමය වෙනස් කිරීමට උත්සාහ කරනවා නම් ඒ අය රට නැවත විනාශය වෙත යොමු කිරීමටයි උත්සාහ කරන්නේ. ඒ නිසා කවුරුන් බලයට පැමිණියත් අද ඇති කරගෙන තිබෙන එකඟතා ආරක්ෂා කර ගනිමින් කටයුතු කිරීම තමයි කළ යුත්තේ.
