ඉන්දු ශ්‍රී ලංකා මිත්‍රත්වයට වසර 100ක් සපිරීම නිමිත්තෙන් ඉන්දියානු රජයෙන් ශ්‍රී ලංකාවේ වතු ආශ්‍රිත ප්‍රදේශවල ජනතාවට පරිත්‍යාග රැසක් ලබාදීමේ සමාරම්භක වැඩසටහන ඉන්දියානු මහාකොමසාරිස් සන්තොස් ජා මහතාගේ ප්‍රධානත්වයෙන් මාතලේ මහත්මා ගාන්ධි ජාත්‍යන්තර සම්මන්ත්‍රණ ශාලාවේදී ආරම්භ කෙරුණි.
එම වැඩසටහන යටතේ මධ්‍යම, සබරගමු, වයඹ හා ඌව පළාත්වල වතු ආශ්‍රිත පාසල් සිසුන් 10000ක් වෙත පාසල් උපකරණ ප්‍රදානය කිරීම, පාසල් සඳහා ප්‍රථමාධාර කට්ටල, ආයුර්වේද බෙහෙත් හා ක්‍රීඩා උපකරණ, සූර්ය පැනල ලබාදීම හා මාතලේ මහත්මා ගාන්ධි සම්මන්ත්‍රණ ශාලාවේ ඉදිකළ ඉන්දියානු පුස්තකාලය විවෘත කිරීම ඉන්දීය කොමසාරිස්වරයා අතින් සිදුවිය.
මෙහිදී අදහස් දැක්වූ ඉන්දීය මහකොමසාරිස් සන්තොස් ජා මහතා මෙසේ පැවසීය.
“ඉන්දියාව හා ශ්‍රී ලංකාව අතර දිගු කලක සිට සමීප සබඳතාවක් පවතින අතර එය කලාපීය වශයෙන්ද ඉතා වැදගත් සබඳතාවක්.
එම සබඳතාව තුළින් දෙරටේ ආගමික, සංස්කෘතික ආර්ථික වර්ධනයන්ට ඉවහල් වන අතර ඉන්දියානු රජයේ මැදිහත්වීම මත වතු ආශ්‍රිත ප්‍රදේශවල ජනතාවගේ නිවාස ප්‍රශ්නයට විසඳුමක් ලෙස ඉන්දියානු රජයේ සහයෝගය මත නිවාස ඉදිකිරීමේ වැඩසටහන සාර්ථකව සිදුකර තිබෙනවා.
ශ්‍රී ලංකාව තුළ ආගමික ස්ථාන 5000ක් සඳහා සූර්ය පැනල ලබාදීමට ඉන්දියානු රජය මැදිහත් වී කටයුතු කිරීම තුළින් ආගමික ස්ථානවල පැවති විදුලි ගැටලුවට විසඳුමක් ලැබෙන බවත් ඉදිරියේදී ඉන්දියාවේ ආගමික සිද්ධස්ථාන නැරඹීමට පැමිණෙන ශ්‍රී ලාංකික බැතිමතුන් හට නොමිලේ වීසා ලබාදීමේ වැඩසටහනක් පිළිබඳවද අවධානය යොමු කර තිබෙනවා’ යැයි ඉන්දීය මහකොමසාරිස්වරයා මෙහිදී වැඩිදුරටත් සඳහන් කළේය.”
මෙම අවස්ථාවට ඉන්දියානු සහකාර මහකොමසාරිස් වෛද්‍ය අකිරා එස්. මෙනෙවිය හා මාතලේ මහත්මා ගාන්ධි පදනම නියෝජනය කරමින් නීතිඥ එම්. මනිවන්න මහතා ඇතුළු පිරිසක් සහභාගි වූහ.
