වතු කම්කරු දෛනික වැටුප රුපියල් 1,700 දක්වා ඉහළ නැංවීමට අදාළ ගැසට් නිවේදනය පඩි පාලක සභාවේ සභාපති එච්.කේ.කේ.ඒ. ජයසුන්දර මහතාගේ අත්සනින් යුතුව නිකුත් කර තිබේ.
තේ වතු කම්කරුවකුගේ දෛනික වැටුප 1,350 ලෙස එහි සඳහන් වන අතර, එම වැටුප සේවක අර්ථසාධක අරමුදල් සහ සේවා නියුක්තිකයන්ගේ භාර අරමුදල් ගෙවීම්වලට යටත්ව සිදු කළ යුතු බව අදාළ ගැසට් නිවේදනයේ සඳහන් වේ.
ඵලදායීතාව මත පදනම් වූ දිරි දීමනාවක් ලෙස රුපියල් 350ක මුදලක් ද ගෙවිය යුතු බව එම ගැසට් නිවේදනයේ තවදුරටත් සඳහන්ය.
රබර් වතු කම්කරුවන්ගේ දෛනික වැටුප ද 1,700 දක්වා ඉහළ නැංවිය යුතු බවට ද අදාළ ගැසට් නිවේදනයේ සඳහන් වන අතර, මෙම යෝජනා සම්බන්ධයෙන් වන විරෝධතා, එසේ විරුද්ධ වීමට හේතු වන කරුණු පිළිබඳ ප්‍රකාශයක් ද සමඟ එළැඹෙන 28 වැනිදා මධ්‍යහ්න 12.00ට පෙර තමා වෙත යොමු කරන ලෙස පඩි පාලක සභාවේ සභාපතිවරයා ගැසට් නිවේදනයේ තවදුරටත් සඳහන් කර ඇත.
