බංග්ලාදේශයේ අන්තර්වාර රජය දිගු කාලයක් පැවැතීම එරට හමුදා පාලනයක් ස්ථාපිත වීමේ අවදානමක් මතුවන බවට අනාවැකි පළ වී ඇතැයි විදෙස් මාධ්‍ය වාර්තා කළේය. ජාත්‍යන්තර දේශපාලන විශ්ලේෂකයකු හා තීරු ලිපි රචකයකු වන මයිකල් කූගල්මන් එම අනාවැකිය පළ කර ඇති අතර, ස්වාධීන පර්යේෂණ සම්බන්ධව අමෙරිකාවේ පිහිටි විල්සන් මධ්‍යස්ථානයේ දකුණු ආසියාතික කලාපයේ අධ්‍යක්ෂවරයා ද වන කූගල්මන් වැඩිදුරටත් ප්‍රකාශ කර ඇත්තේ අන්තර්වාර රජයේ හසීනාගේ අවාමි ලීග් පක්ෂයේ කිසිදු නියෝජිතයකු හෝ නොමැති බැවින් ඉදිරියේදී පැවැත්වෙන ඕනෑම මැතිවරණයකදී එම පක්ෂයට වැඩි වාසියක් ද ලැබෙනු ඇති බවය.
ඉන්දියාවේ ඒඑන්අයි පුවත් සේවය සමඟ සම්මුඛ සාකච්ඡාවකට එක්වෙමින් ජාත්‍යන්තර දේශපාලන විශ්ලේෂක කූගල්මන් මේ අනතුරු ඇඟවීම සිදු කර තිබේ.
මේ වන විට බංග්ලාදේශයේ යුද හමුදාව මීට පෙර හසීනා බලයේ සිටියදී පැවැති තත්ත්වයට වඩා වෙනස් පසුබිමක තිබෙන බවත්, අවාමි ලීග් රජය බලයේ සිටි 2009 සිට පසුගියදා රාජ්‍ය බලය බිඳ වැටෙනතුරු බැරැක්කවල සිරවී සිටි එරට හමුදාව මේ වනවිට වඩාත් ශක්තිමත් ආකාරයෙන් හැසිරෙමින් සිටින බවත් ඔහු ප්‍රකාශ කර ඇතැයි වාර්තා වේ. මේ වන විට බංග්ලාදේශයේ පවතින දැඩි දේශපාලන අස්ථාරවභාවය එරට හමුදාවට බලයට පත්වීමට අවශ්‍ය පසුබිම නිර්මාණය කරමින් තිබෙන බවට ඔහු අනතුරු අඟවා තිබේ.
