අ‍ෙමරිකානු ඩොලර් මිලියන 61ක වියදමින් ඉන්දියානු ණය ආධාර යටතේ නවීකරණය කරනු ලබන උතුරු දුම්රිය මාර්ගයේ ඉදිකිරීම් කටයුතු අවසන් අදියරේ පවතින බව ව්‍යාපෘති බලධාරිහු පවසති. අදියර කිහිපයක් යටතේ ඉදිකිරීම් ආරම්භ කරන ලද මෙම උතුරු දුම්රිය මාර්ගයේ ඕමන්තේ සිට වව්නියාව, වව්නියාව සිට අනුරාධපුර, අනුරාධපුර සිට මහව දක්වා අදියර තුනක් වශයෙන් බෙදා තිබිණි. මේ සම්බන්ධයෙන් අදහස් දක්වමින් නියෝජ්‍ය සාමාන්‍යාධිකාරි එන්. ජේ. ඉදිපොළගේ මහතා කියා සිටියේය. මෙම ව්‍යාපෘතිය යටතේ දුම්රිය ස්ථාන 06ක් නවීකරණය කරන අතර පැයට කිලෝමීටර් 100ක වේගයෙන් ගමන් කළ හැකි පරිදි ඉතාමත් සුවපහසු දුම්රිය ගමනා ගමනයක් ජනතාවට ලබාදීමට අවශ්‍ය තාක්ෂණික ක්‍රමවේදයන් රැසක් මෙම ව්‍යාපෘතියට එක්කර ඇතැයි මේ සම්බන්ධයෙන් අදහස් දක්වමින් ව්‍යාපෘති අධ්‍යක්ෂ චින්තක ජයසේකර මහතා කියා සිටියේය. වැඩිදුරටත් අදහස් දැක්වූ අධ්‍යක්ෂවරයා කිලෝමීටර් 128ක් වූ පැරණි දුම්රිය මාර්ගය සම්පූර්ණයෙන්ම ඉවත්කර නව දුම්රිය මාර්ගය සවිකර ඇති බවත් යාන්ත්‍රික සංඥා පද්ධතියක්, වර්ණ සංඥා පද්ධතියක් සහ පැයට කිලෝමිටර් 100ක වේගයෙන් ධාවනය කළ හැකි සහ දුම්රියක ගමන් කිරීමේදී අධික ලෙස ගැස්සීම වළක්වා ගමන් සුවපහසුව ඇති කිරීමත් සඳහා සියලුම දුම්රිය පීලි වැද්දුම් තාක්ෂණය යටතේ සවිකර පීලි අතර ප්‍රසාරණය වීම සහ කම්පනය උරා ගැනීමත් එමඟින් පීලි පහත් වීම, ගැස්සීම සහ ක්ෂය වීම වැළැක්වීමටත් අවශ්‍ය විශේෂ තාක්ෂණික ක්‍රම උපයෝගි කරගෙන මෙම ඉදි කිරීම් සිදු කර ඇතැයි ව්‍යාපෘති අධ්‍යක්ෂවරයා වැඩිදුරටත් පැහැදිලි කළේය. මෙම නවීකරණ කටයුතුවලින් පසු උතුරු දුම්රිය මාර්ගයේ දුම්රිය ගමන් ඇරඹීමෙන් පසු මෙතෙක් පැවති ගමන් වාර ප්‍රමාණය ද වැඩි කිරීමට දුම්රිය දෙපාර්තමේන්තුව කටයුතු සැලසුම් කර තිබේ. එමෙන්ම අනුරාධපුර දුම්රිය ස්ථානය මෙහෙයුම් මධ්‍යස්ථානයක් ලෙස පවත්වාගෙන යාමටත් මෙමඟින් අපේක්ෂිත බව ව්‍යාපෘති අංශය පවසයි. උතුරු දුම්රිය මාර්ගය ජනතා අයිතියට පත් වීමෙන් පසු සංචාරක කර්මාන්තයේ ප්‍රවර්ධනයට ද එමඟින් පිටිවහලක් වනු ඇති අතර උතුරු දුම්රිය මාර්ගය ඔස්සේ දුම්රියෙන් ගමන් කිරීමෙන් මෙතෙක් ජනතාවට පැවති ගැටලු රැසකට තිරසර විසැඳුම් ලැබෙනු ඇත.
