පොලොන්නරුවෙ-අරලගංවිල ප්‍රධාන මාර්ගයේ මැදගම ප්‍රදේශයේ පසුගියදා (13) රාත්‍රියේ අරලගංවිල සිට මැදගම ප්‍රදේශයට ගමන් කරමින් තිබූ යතුරුපැදියක් නතර කර තිබූ ලොරි රථයක ගැටී සිදු වූ අනතුරෙන් එම යතුරු පැදියේ ගමන් ගත් පුද්ගලයා එම ස්ථානයේදීම මියගොස් ඇති බව අරලගංවිල පොලිසිය පවසයි. මෙලෙස මියගොස් ඇත්තේ අරලගංවිල අංක 151/01, මැදගම, දේවගල, ලිපිනයේ පදිංචිව සිටි 49 වියැති එච්.එම්. සෙනවිරත්න නමැති දෙදරු පියෙකි.
අනතුර සම්බන්ධයෙන් ලොරි රථයේ රියැදුරු අත්අඩංගුවට ගෙන 14 වැනිදා පොලොන්නරුව මහේස්ත්‍රාත් අධිකරණයට ඉදිරිපත් කිරීමට කටයුතු කරන බව අරලගංවිල පොලිස් ස්ථානාධිපති පොලිස් පරීක්ෂක ඉඳුනිල් හේමපාල මහතා අප කළ විමසීමකදී පැවසීය. පොලොන්නරුව ජ්‍යෙෂ්ඨ පොලිස් අධිකාරි නිශාන් ද සිල්වා මහතාගේ උපදෙස් මත අරලගංවිල පොලිස් ස්ථානාධිපති පොලිස් පරීක්ෂක ඉඳුනිල් හේමපාල මහතා ඇතුළු පොලිස් රථ වාහන අංශයේ පොලිස් නිලධාරී කණ්ඩායමක් විසින් මේ පිළිබඳ වැඩිදුර පරීක්ෂණ සිදු කරයි.
