ත්‍රිකුණාමලයේ සිට පුල්මුඩේ මුහුදු තීරයේ රතු කකුළුවන් අතිවිශාල පිරිසක් මියයෑම මුහුදු ජලයේ ලවණ අඩු වීමක් නිසා සිදු වූවක් බව නාරා ආයතන‍යේ, අධ්‍යක්ෂ ජනරාල් ආචාර්ය අරුලානන්දන් මහතා පවසයි.
මෙය බොහෝ විට නිරිතදිග මෝසම් කාලය සමඟ සිදු වන සාමාන්‍ය ක්‍රියාවලියක් බව ද ඒ මහතා කියයි. ”කකුළුවන් මියයෑම සිදු වූ ත්‍රිකුණාමලය Dutch bay ප්‍රදේශයේ මියගිය කකුළුවන්ගේ හා මුහුදු ජලයේ සාම්පල අප පරීක්ෂාවට ලක් කළා. මෙය සාමාන්‍යයෙන් සෑම වසරකම ජූනි, ජූලි, අගෝස්තු මාසවලදී සිදු වන ක්‍රියාවලියක් නමුත් මේ වසරේ අසාමාන්‍ය ලෙස කකුළුවන් මියයෑමක් සිදු වී තිබෙනවා. රතු කකුළුවන් මියගොස් ඇත්තේ මුහුදු ජලයේ ලවණ ඌනතාවක් නිසා බවත්, දකුණු මුහුදු සීමාවේ මෙවැනි ක්‍රියාවලියක් සිදු වන්නේ මුහුදු මට්ටමේ යට තිබෙන ජලය මුහුදු මට්ටමින් උඩට පැමිණීම ( up welling) නිසා සිදු වන ඔක්සිජන් ඌනතාවක් හේතුවෙන් බවත් පර්යේෂණ මඟින් තහවුරු වී තිබෙනවා” යැයි ද ආචාර්ය අරුලානන්දන් මහතා දිනමිණ කළ විමසුමකදී අනාවරණය කළේය.
