සිය පාසලේ අධ්‍යාපනය ලබන 16 හැවිරිදි සිසුවියක, සිසුන් පිරිසක් අතින් දූෂණය වීමක් වසන් කිරීමට කටයුතු කළ බවට වූ චෝදනා මත අත්අඩංගුවට ගත් තණමල්විල පිහිටි ප්‍රසිද්ධ පාසලක විදුහල්පති, නියෝජ්‍ය විදුහල්පති ඇතුළු ගුරුවරුන් සිව් දෙනා වැල්ලවාය මහේස්ත්‍රාත් අධිකරණයට ඊයේ (14) ඉදිරිපත් කිරීමෙන් අනතුරුව රුපියල් ලක්ෂ 05 බැගින් වූ ශරීර ඇප මත මුදා හැරීමට මහේස්ත්‍රාත් චතුර දිසානායක මහතා නියෝග කළේය.
මෙලෙස ඇප මත නිදහස් කෙරුණේ විදුහල්පතිවරයා, නියෝජ්‍ය විදුහල්පතිවරයා, විනය කමිටුව භාර ගුරුවරියක හා උපදේශන ගුරුවරියයි. මෙම සිදුවීමට අදාළව තණමල්විල කලාප අධ්‍යාපන අධ්‍යක්ෂවරයාගෙන් ද පොලිසිය ප්‍රකාශයක් ලබාගෙන තිබූ අතර එහිදී ද අනාවරණය වී තිබුණේ සිද්ධිය සම්බන්ධයෙන් පොලිසියට පැමිණිලි කරන ලෙසට විදුහල්පතිවරයා ඇතුළු පිරිස කලාප අධ්‍යාපන අධ්‍යක්ෂවරයා විසින් උපදෙස් දී තිබියදිත් එය පැහැරහැර ඇති බවයි. ඒ අනුව මෙම සිදුවීමට අදාළව තණමල්විල පොලිසිය මඟින් පෙරේදා (13) එම විද්‍යාලයේ විදුහල්පතිවරයාත් නියෝජ්‍ය විදුහල්පතිවරයාත් විනය කමිටුව භාර ගුරුවරිය හා උපදේශන ගුරුවරිය අත්අඩංගුවට ගෙන අධිකරණයට ඉදිරිපත් කිරීමට කටයුතු කරනු ලැබීය. අධිකරණයට ඉදිරිපත් කෙරුණු විදුහල්පතිවරයා ඇතුළු ගුරුවරුන් සිව්දෙනා රුපියල් ලක්ෂ 02 බැගින් වූ ශරීර ඇප මත මුදා හරිමින් මේ මස 22 වැනි දින අධිකරණයේ පෙනීසිටින ලෙසට මහේස්ත්‍රාත්වරයා නියෝග කළේය.
ඇප ලබාදෙමින් මහේස්ත්‍රාත්වරයා පවසා සිටියේ සාක්ෂිකරුවන්ට කිසිදු බලපෑමක් නොකළ යුතු බවයි. එවැනි සිද්ධියක් සම්බන්ධයෙන් තොරතුරු වාර්තා වුවහොත් ඇප අවලංගු කර නැවත රක්ෂිත බන්ධනාගාරගත කරන බවටත් රක්ෂිත බන්ධනාගාරගත නොකරන්නේ විදුහල්තිවරයා මෙම පිරිස පාසල තුළ රාජකාරි කටයුතු කිරීමට අවශ්‍ය නිසා බවත් අවවාද කරමින් ප්‍රකාශ කර සිටියේය.
මෙම දැරිය සමූහ දූෂණය වීම සම්බන්ධයෙන් විමර්ශන පැවැත්වූ තණමල්විල පොලිසිය මෙයට පෙර සිසුන් 17 දෙනකු හා 49 හැවිරිදි කාන්තාවක අත්අඩංගුවට ගෙන වැල්ලවාය මහේස්ත්‍රාත් අධිකරණයට ඉදිරිපත් කරනු ලැබීය.
එහිදී මහේස්ත්‍රාත්වරයා 49 හැවිරිදි කාන්තාව හා සිසුන් තිදෙනකු මේ මස 22 වැනි දින දක්වා රක්ෂිත බන්ධනාගාරගත කළ අතර අනෙකුත් සිසුන් 14 දෙනා බණ්ඩාරවෙල සුරක්ෂා මධ්‍යස්ථානයේ රඳවා තබන ලෙස නියෝග කරනු ලැබීය.
මොනරාගල කොට්ඨාස භාර ජ්‍යෙෂ්ඨ පොලිස් අධිකාරී බුද්ධි උඩුගමසූරිය මහතාගේ උපදෙස් පරිදි තණමල්විල මූලස්ථාන පොලිසියේ ස්ථානාධිපති ප්‍රධාන පොලිස් පරීක්ෂක ඩී.එම්.පී. බණ්ඩාර මහතා ඇතුළු නිලධාරීන් කණ්ඩායමක් වැඩිදුර විමර්ශන පවත්වයි.
