ඉන්දියාවේ එලියාන්ස් ( Alliance ) ගුවන් සමාගම චෙන්නායි හා යාපනය අතර 500 වෙනි ගුවන් ගමන පෙරේදා (08) සම්පූර්ණ කරනු ලැබීය.
මේ නිමිත්තෙන් චෙන්නායි සිට පැමිණි එලියාන්ස් ගුවන් සේවයට අයත් ගුවන් යානයේ කාර්ය මණ්ඩලය හා යාපනය ජාත්‍යන්තර ගුවන්තොටුපොළේ කාර්ය මණ්ඩලය විසින් ඉතා චාම් උත්සවයක් පවත්වා කේක් ගෙඩියක් කපමින් 500 වෙනි ගුවන් ගමන සමරනු ලැබීය. මේ වන විට එම සමාගම විසින් යාපනය හා චෙන්නායි අතර මඟීන් 50000කට වැඩි සංඛ්‍යාවක් ප්‍රවාහනය කොට ඇති බවත් මේ වසරේ ඉදිරි මාස කිපය ඇතුළත තවත් මඟීන් ඊට සමාන සංඛ්‍යාවක් රැගෙන එමට සැලසුම් කොට ඇති බවත් මේ අවස්ථාවේදී එලියාන්ස් ගුවන් සමාගමේ ප්‍රධානීන් පැවසූහ.
2019 ඔක්තෝම්බර් 17 වැනිදා මෙරට තෙවැනි ජාත්‍යන්තර ගුවන්තොටුපොළ ලෙසට පලාලි ජාත්‍යන්තර ගුවන්තොටුපොළ විවෘත වූ නමුත් කොරෝනා සමයේදී ගුවන්තොටුපළ වසා දැමීමෙන් පසුව යළි එම ගුවන් ගමන් ආරම්භ වූයේ 2022 දෙසැම්බර් 12 දිනයි.
එදා සිට මේ දක්වා ඉන්දියාවේ එලියාන්ස් (Alliance) ගුවන් සමාගමට අයත් යානාවලින් ගුවන් ගමන් වාර 500ක් සම්පූර්ණ කොට තිබේ.
