රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යාංශය යටතේ ඇති දේශීය ණය සහ සංවර්ධන අරමුදල මඟින් රටේ පළාත් පාලන ආයතන 45කට රුපියල් මිලියන 1220ක් වටිනා ව්‍යාපෘති 50ක් සඳහා මූල්‍ය පහසුකම් සැපයීම පසුගියදා උත්සවාකාරයෙන් ලබා දුන් බව දේශීය ණය සහ සංවර්ධන අරමුදලේ අධ්‍යක්ෂ කේ.ඩී. චිත්‍රපාල මහතා ‘දිනමිණ’ට පැවසීය.
මේ ව්‍යාපෘතිවලින් ව්‍යාපෘති 80ක් ද, පළාත් පාලන ආයතනවලට අයිති ගොඩනැඟිලිවල වහලය මත සවිකරන ලද හිරු එළියෙන් පුනර්ජනනීය බලශක්ති නිෂ්පාදනය කරන ව්‍යාපෘති වීම කැපී පෙනෙන ලක්ෂණයක් විය.
මේ ව්‍යාපෘතිවලට අමතරව ආදාහනාගාර ඉදිකිරීමේ ව්‍යාපෘති 5කට, වෙළෙඳපොළ ඉදිකිරීමේ ව්‍යාපෘති 5කට හා ජල ව්‍යාපෘතියකට ද මේ වැඩසටහන යටතේ ණය මුදල් ප්‍රදානය කර තිබේ.
මේ සහන මූල්‍ය පහසුකම් පිරිනැමීමේ වැඩසටහන අගමැති, රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන ඇමැති දිනේෂ් ගුණවර්ධන මහතාගේ ප්‍රධානත්වයෙන් පැවති අතර ඒ සඳහා ඇමැතිවරුන්, නියෝජ්‍ය ඇමැතිවරුන්, ආණ්ඩුකාරවරුන්, තානාපතිවරුන්, පාර්ලිමේන්තු මන්ත්‍රීවරුන්, පළාත් පාලන ආයතනවල ප්‍රධානීහු ද එක්වූහ. ඊට අමතරව එක්සත් ජාතීන්ගේ සංවර්ධන වැඩසටහන, ආසියානු සංවර්ධන බැංකුව, ආසියානු පදනම හා ජාත්‍යන්තර මූල්‍ය ආයතනවලින් ද නියෝජිතයන් සහභාගි වූ අතර, සුනිත්‍ය බලශක්ති අමාත්‍යාංශය සහ ජාතික ඉංජිනේරු පර්යේෂණ ආයතනයෙන් ද නිලධාරීහු මේ අවස්ථාවට සහභාගි වූහ.
මේ ආයතන රටේ සියලුම පළාත් පාලන ආයතනවලට මූල්‍ය සහාය ලැබෙන පරිදි ණය ප්‍රතිපත්ති සකස් කර,ණය යෝජනා ක්‍රම ක්‍රියාත්මක කිරීමට දේශීය ණය සංවර්ධන අරමුදලේ සභාපති සහ රාජ්‍ය පරිපාලන ස්වදේශ කටයුතු, පළාත් සභා හා පළාත් පාලන අමාත්‍යාංශයේ ලේකම් ප්‍රදීප් යසරත්න මහතා සහ එහි අධ්‍යක්ෂ හා ප්‍රධාන විධායක නිලධාරි කේ. ඩී. චිත්‍රපාල මහතා පියවර ගෙන ඇති බව ද අගමැති දිනේෂ් ගුණවර්ධන මහතා මෙහිදී ප්‍රකාශ කළේය. ඉදිරියේදී නව ණය යෝජනා ක්‍රම රාශියක් හඳුන්වා දීමට නියමිත බව ප්‍රධාන විධායක නිලධාරිවරයා ‘දිනමිණ’ට වැඩිදුරටත් ප්‍රකාශ කළේය.
