පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ රුවන් ගුණසේකර මහතා පෙරේදා (31) රාජකාරී සඳහා යමින් සිටියදී මෝටර් රථය ලොරි රථයක ගැටී අනතුරකට ලක්ව ඇති අතර, පින්වත්ත පොලිසිය ඒ සම්බන්ධයෙන් පරීක්ෂණ ආරම්භ කර තිබේ.
අනතුරෙන් කිසිවකුටත් හානි සිදුව නොමැති අතර, නිල රථයට බරපතළ හානි සිදුව ඇති බව සඳහන් වේ. ඒ මහතා වාද්දුවේ පිහිටි සිය නිවෙසේ සිට කොළඹ පොලිස් මූලස්ථානය දක්වා ගමන් කරමින් සිටියදී ගාලු පාරේ නල්ලූරුව ප්‍රදේශයේදී ඒ දෙසටම ගමන්ගත් ලොරි රථයක ගැටී ඇත. මාධ්‍ය ප්‍රකාශකවරයා ගමන්ගත් මෝටර් රථය දකුණු මංතීරුවේ ගමන් කර ඇති අතර, ඒ දෙසටම වම් පසින් ගමන්ගත් ලොරි රථය වෙනත් වාහනයකට ඉස්සර කර යෑමේදී ලොරි රථයේ පිටුපස කොටස මෝටර් රථයේ ගැටී ඇති බව පොලිස් පරීක්ෂණවලදී හෙළිව තිබේ.
අනතුරෙන් පසු රුවන් ගුණසේකර මහතා වෙනත් පොලිස් ජීප් රථයක් ගෙන්වාගෙන රාජකාරී සඳහා වාර්තා කර ඇත. ලොරි රථ රියැදුරුගේ අපරික්ෂාකාරී රිය ධාවනය අනතුරට හේතු වී ඇති බැවින් ඔහුව අත්අඩංගුවට ගෙන ඇත. ලොරි රථ රියැදුරු පානදුර මහේස්ත්‍රාත් අධිකරණයට ඉදිරිපත් කිරීමෙන් පසු රුපියල් ලක්ෂ පහක ශරීර ඇප මත මුදා හැර ඇති බව පොලිසිය සඳහන් කළේය. පින්වත්ත ස්ථානාධිපති ප්‍රධාන පොලිස් පරීක්ෂක පත්ම නන්දන මහතාගේ උපදෙස් පරිදි රථ වාහන අංශ ස්ථානාධිපති සැරයන් ප්‍රියන්ත (13980) සහ කොස්තාපල් මධුෂාන් (104235) පරීක්ෂණ පවත්වයි.
