වැල්ලම්පිටිය පොලිස් වසමේ කොළොන්නාවේ දෙමහල් නිවෙසක යට මහලට ඇතුළු වූ සොරෙකු එහි ලාච්චුවක හා ඇඳක් උඩ තිබූ රොලෙක්ස් වර්ගයේ රුපියල් ලක්ෂ 35ක් වටිනා අත්ඔරලෝසුවක්, රුපියල් 20,000ක සැම්සුන් ජංගම දුරකතනයක්, රුපියල් 6,000ක නොකියා දුරකතනයක් හා රුපියල් 20 කොළ පිරවූ ටොෆි බෝතලයක බහාලූ මුදලින් කොටසක් සොරාගෙන යාමේ සිද්ධියක් පිළිබඳව නිවෙසේ පදිංචිකරු වන 75 වියැති පුද්ගලයෙකු වැල්ලම්පිටිය පොලිසියට පැමිණිල්ලක් කොට තිබේ.
නිවෙසේ තනිව පදිංචිව සිටි ගෙහිමියා ඩුබායි රටේ කෝකියෙකු ලෙස සේවය කොට ඇති අයෙකු බවද දැනට ඔහුගේ පුතාද එම රටේම සේවය කරන අයෙකු වන අතර, නැතිවූ අත්ඔරලෝසුව ඔහුට එවා ඇත්තේද එම පුතා බවද පොලිස් පැමිණිල්ලේ සඳහන් වන අතර, තමා ආගම ඇදහීම පිණිස අලුයම 4ට පමණ අවදිව මුව දෝවනය සඳහා නාන කාමරයට යද්දී ගෙදර ඉස්සරහ දොර අඩවන්ව තබා ගිය අතරතුර මෙය වෙන්නට ඇති බව ද ඔහු පොලිසියට පවසා ඇත.
අපරාධ විමර්ශන අංශ සොකෝ පොලිසිය ද මෙම විමර්ශනයට සම්බන්ධව කටයුතු කරන අතර, ඇඟිලි සලකුණු සටහන් ගැනීම ද සිදු කර ඇත. සැකකරු අත්අඩංගුවට ගැනීමේ පරීක්ෂණ වැල්ලම්පිටිය පොලිස් ස්ථානාධිපති ප්‍රධාන පොලිස් පරීක්ෂක ඉන්දික නිලන්ත මහතාගේ උපදෙස් පරිදි එහි අපරාධ අංශ ස්ථානාධිපති ඉසුරු ශාමික මහතා සිදු කරනු ලබයි.
