හෙරොයින් සහ අයිස් මත්ද්‍රව්‍ය තොගයක් සමඟ යුද හමුදා ජාතික ආරක්ෂක බළකායෙන් පලා ගොස් සිටින සෙබළෙකු පෙරේදා (31) සවස රත්ගම අන්හන්දියේදී පොලිස් විශේෂ කාර්ය බළකායේ නිලධාරීන් කණ්ඩායමක් විසින් අත්අඩංගුවට ගෙන තිබේ.
පොලිස් විශේෂ කාර්ය බළකායට ලැබුණ තොරතුරකට අනුව මෙම පුද්ගලයා සන්තකයේ තිබී හෙරොයින් ග්‍රෑම් 51යි මිලිග්‍රෑම් 292ක්ද අයිස් මත්ද්‍රව්‍ය ග්‍රෑම් 150යි මිලිග්‍රෑම් 797ක් ද අත්අඩංගුවට ගෙන තිබේ. 2011 වසරේදී ශ්‍රී ලංකා යුද හමුදා ජාතික ආරක්ෂක බළකායට සෙබළෙකු ලෙස බැඳී ලක්ෂපාන කඳවුරේ සේවය කරමින් සිටියදී මොහු 2022 වසරේදි හමුදා සේවයෙන් පලා ගොස් ඇති බව මුලික විමර්ශනවලදී හෙළිවී ඇත.
පොලිස් විශේෂ කාර්ය බළකාය විසින් ඉදිරි නීතිමය කටයුතු සඳහා සැකකරු රත්ගම පොලිසියට භාරදී තිබේ. සැකකරු ඊයේ අධිකරණය වෙත ඉදිරිපත් කිරීමට නියමිතව තිබුණි.
