වරෙන්තු දහඅටක් ඇති දිවයිනේ ලියාපදිංචි අපරාධකරුවන් සිව් දෙනකු අනියම් බිරිඳක් සොයා අවිස්සාවේල්ල ප්‍රදේශයේ සිට මෝටර් රථයකින් ගම්පොළ කුරුඳුවත්ත ප්‍රදේශයට පැමිණෙමින් සිටියදී කුරුඳුවත්ත පොලිසිය මඟින් ඊයේ රාත්‍රියේ දී මෙම පිරිස අත්අඩංගුවට ගෙන තිබේ.
මෙසේ අත්අඩංගුවට ගෙන ඇත්තේ අවිස්සාවේල්ල, ඉහළ තල්දූව, දෙහිඕවිට, ප්‍රදේශවල පදිංචි වයස 23,25 හා 27 යන වයස්වල පසුවන්නන් බව පොලිසිය පවසයි.
පොලිස්පතිතුමාගේ උපදෙස් මත ක්‍රියාත්මක අපරාධ හා මෙහෙයුම් යටතේ කුරුඳුවත්ත නගරය තුළ ජංගම මුර සංචාරයේ යෙදුණු පොලිස් නිලධාරීන්ට මොවුන් කොටුවී ඇත.
රාත්‍රියේදී මෝටර් රථයකින් පැමිණ ඇති මොවුන්ගෙන් වෙන වෙනම ප්‍රශ්න කිරීමේදී ලබා දී ඇති පරස්පර ප්‍රකාශ සමඟ සොයා බැලීමේදී මොවුන් නම ගිය අපරාධකරුවන් බව හෙළි වී ඇත.
මෙම පිරිසේ විසිහත් හැවිරිදි පුද්ගලයාට වරෙන්තු 13ක් ඇති අතර අනෙක් දෙදෙනාට විවෘත වරෙන්තු පහක් ඇත. ඒ කුඩු, ගංජා, කසිප්පු ජාවාරමේ යෙදීම හා අනෙකුත් අපරාධ සඳහා බව පොලිසිය පවසයි.
මේ සියලු වරෙන්තු අවිස්සාවේල්ල අධිකරණය මඟින් නිකුත් කළ ඒවා වන අතර මොවුන්ට තවත් වරෙන්තු හා අපරාධ ඇත්ද යන්න කුරුඳුවත්ත පොලිසිය මඟින් අනිකුත් පොලිස් ස්ථාන විමසීමට කටයුතු කර ඇත. මෙයින් එක් අයකු ආයුධ පෙන්වා කාන්තාවක් බිය වද්දා රුපියල් තුන් ලක්ෂ පනස් හයදහසක් මංකොල්ලකා ඇති අතර ඒ සම්බන්ධයෙන් හා වරෙන්තු සම්බන්ධයෙන් දෙහිඕවිට හා අවිස්සාවේල්ල පොලිසි මඟින් මොහු සොයමින් සිට ඇති බවද හෙළි වී ඇත. වැඩිදුර සොයා බැලීමේදී වරෙන්තු 13ක් ඇති 27 හැවිරිදි පුද්ගලයා අනියම් ඇසුර පැවැත්වූ බිරිය සොයා මොවුන් පැමිණ ඇති බවද අනාවරණය වී ඇත.
අනියම් බිරිය සොයා ආ මෝටර් රථය ද මොවුන්ගේ නොවන බව හෙළි වී ඇති අතර ඒ සම්බන්ධයෙන්ද පොලිසිය පරීක්ෂණ අරඹා ඇත.
මෙම සියලු වරෙන්තුකරුවන් ගම්පොළ අධිකරණය වෙත ඉදිරිපත් කිරීමට නියමිතය.
