මඩකලපුව දිස්ත්‍රික්කයේ මත්ද්‍රව්‍ය භාවිතය සැලකිය යුතු අන්දමින් ඉහළ යෑමත් සමඟ,’අපි මත්ද්‍රව්‍යවලට එරෙහිව නැඟී සිටිමු ‘යන තේමාව යටතේ පාසල් සිසුන් හා තරුණයන් දැනුම්වත් කිරීමේ විශේෂ වැඩසටහනක් පෙරේද (31) නැඟෙනහිර ආරක්ෂක සේනාංකාධිපති මේජර් ජෙනරාල් එස්.ඒ. කුලතුංග සහ නැඟෙනහිර පළාත් ජ්‍යෙෂ්ඨ නියෝජ්‍ය පොලිස්පති අජිත් රෝහණ යන මහත්වරුන්ගේ ප්‍රධානත්වයෙන් කාත්තන්කුඩි මධ්‍ය මහා විද්‍යාලයේදී පැවැත්වීය.
නැගෙනහිර ආඥාපති මේජ්ර් ජෙනරාල් කුලතුංග මහතාගේ සංකල්පයකට අනුව ක්‍රියාත්මක වුණු මෙම වැඩසටහන සඳහා කාත්තන්කුඩි මධ්‍ය මහා විද්‍යාලයේ සිසුන් මෙන්ම ප්‍රදේශයේ තරුණයෝ පන්සියයකට ආසන්න ප්‍රමාණයක් එක්ව සිටියහ.
මත්ද්‍රව්‍ය ජාවාරම්කරුවන්ගේ ප්‍රධාන ඉලක්කය පාසල් සිසුන් බවත්, ඒ පිළිබඳව නිවැරදි අබෝධයක් ලබාගෙන එවැනි ක්‍රියාකාරකම් තුළින් වැළකී සිටීමට හා තම මිතුරන්ද එවැනි දෑ සඳහා යොමු වී ඇත්නම් ඒ පිළිබඳව ඔවුන්ගේ මවුපියන් දැනුම්වත් කර ඉන් මුදා ගැනීමට කටයුතු කළ යුතු බව පාසල් සිසුන් මෙන්ම තරුණයන් දැනුම්වත් කිරීමේ වැඩසටහනට එක්වෙමින් මනෝවිද්‍යාත්මක උපදේශකවරයකු වන එම්.එම්.ජී.බී. මොහොමඩ් රශාඩ් මහතා සඳහන් කළේය.
මත්ද්‍රව්‍ය භාවිතය තුළින් අධ්‍යාපනය කඩාකප්පල් වෙනවා සේම විවිධ අපරාධ ක්‍රියාවන්ට යොමු වීමේ ප්‍රවණතාව වැඩි වී තිබෙන බවද රශාඩ් මහතා මෙහිදී සඳහන් කළේය.
මෙහිදී කාත්තන්කුඩි මුස්ලිම් පල්ලි හා ආයතන සම්මේලය මඟින් නැඟෙනහිර ආරක්ෂක සේනාංකාධිපති සහ නැඟෙනහිර ජ්‍යෙෂ්ඨ නියෝජ්‍ය පොලිස්පතිවරයා මෙන්ම මනෝවිද්‍යාත්මක උපදේශක එම්.එම්.ජී.බී. මොහොමඩ් මහතා ඇගයීමටද ලක්විය.
මෙම අවස්ථාවට යුද හමුදාවේ මෙන්ම පොලිසියේ උසස් නිලධාරීන්, පාසල් සිසුන් මෙන්ම ඔවුන්ගේ මවුපියන්, තරුණ තරුණියෝ විශාල පිරිසක් එක්ව සිටියහ.
