පළාත් පාලන මැතිවරණය නිසා 77000ක් වන අපේක්ෂකයන්ට ජනාධිපතිවරණයේ වැඩ කිරීමේ තහංචියක් පැවැතිය නොහැකි බව අග්‍රාමාත්‍ය දිනේෂ් ගුණවර්ධන මහතා පවසයි.
මහජන එක්සත් පෙරමුණ ඊයේ (01) පැවැත්වූ මාධ්‍ය හමුවට එක්වෙමින් අග්‍රාමාත්‍යවරයා මේ බව සඳහන් කළේය.
පළාත් පාලන ඡන්ද අපේක්ෂකයින්ට වත්මන් ඡන්ද ව්‍යාපාරයේ වැඩ කිරීමට ඇති තහංචිය සම්පූර්ණයෙන්ම ඉවත් කරන ලෙස ඉදිරි දිනවලදී මහජන එක්සත් පෙරමුණ පක්ෂයක් ලෙස මැතිවරණ කොමසාරිස්වරයාගෙන් ඉල්ලීමක් කරන බව ද අග්‍රාමාත්‍යවරයා මෙහිදී සඳහන් කළේය.
එහිදී අගමැතිවරයා මෙසේද කීවේය.
මහජන එක්සත් පෙරමුණේ මධ්‍යම කාරක සභාව අද දින රැස්වී තීරණ කිහිපයකට එළඹුණා. පසුගිය දිනවල අපේ රටේ ජනාධිපතිවරයා හැටියට ජනාධිපති රනිල් වික්‍රමසිංහ මැතිතුමාට අවුරුදු දෙකක් තිස්සේ අඛණ්ඩ සහයෝගයක් රාජ්‍ය පාලනය ස්ථාවර බවට ගෙනෙන්න, ආර්ථිකය කඩාවැටීමෙන් රට ගොඩ ගන්නටත් ජාත්‍යන්තර පිළිගැනීම යළි ස්ථාපිත කිරීමටත්, අපි සක්‍රිය හවුල්කාරිත්වයක් දැක්වූවා.
ඒ අනුව මා අග්‍රාමාත්‍යවරයා හැටියටත් සිසිර ජයකොඩි මහතා දේශීය වෛද්‍ය අමාත්‍යවරයා හැටියටත් යදාමිණි මන්ත්‍රීතුමාත් මේ කාල පරිච්ඡේදය තුළ ආණ්ඩුවේ වැඩපිළිවෙළ සාර්ථක කිරීම සඳහා සහයෝගය සහ ඡන්දය පාවිච්චි කර තිබෙනවා. ජනාධිපති රනිල් වික්‍රමසිංහ මැතිතුමා ගොඩනඟා තිබෙන්නේ පොහොට්ටුවත් තවත් දේශපාලන පක්ෂ ගණනාවකින් සමන්විත සභාග රජයක්. ඒ සභාග රජය මේ රටේ ජනතාවගේ අපේක්ෂාවන් කඩා වැටුණු තැන සිට යළි ගොඩනඟන්නට ජාතික වශයෙන් නිරතවීම සඳහා ගත්තා වූ තීරණය අනුව අපි පක්ෂ භේදයන්ටත් ඉහළින් සිට සියලු දෙනාට ජාතික කර්තව්‍යයක ප්‍රමුඛතාවය කුමක්ද කියන දෙය පැහැදිලි කර දෙමින් රටේ ආර්ථිකය යළි පණ ගැන්වීමට කටයුතු කළා.
මුල් වසරේ තිබුණු ඍණ තත්ත්වයේ ආර්ථික වර්ධනය ධන තත්ත්වයකට අද පරිවර්තනය කර තිබෙනවා. මේ අපේ මතය නෙවෙයි. ජාත්‍යන්තර මූල්‍ය සහ සංවර්ධන රටවල ස්වාධීන පරීක්ෂණවලින් ඉදිරිපත් කර තිබෙන වාර්තා. එයින් කියන්නේ ශ්‍රී ලංකා ආර්ථිකය යළිත් වරක් ධන වර්ධනයකට පරිවර්තනය වෙමින් තිබෙන බවයි. ඒ අතරතුර අපේ රට ලබාගෙන තිබුණු ණය යළි ගෙවීම සඳහා රජය සහ ජාත්‍යන්තර ද්වීපාර්ශ්වික ණය පෞද්ගලික ක්ෂේත්‍රයේ ණය දෙන්නන් අතර තිබුණු තත්ත්වයන් නිරාකරණය කරගන්නට හැකිව තිබෙනවා.
ඒ අතරතුර අප මේ වසරේ ජනාධිපතිවරණයට මුහුණ දෙනවා. ශ්‍රී ලංකා පොදුජන පෙරමුණේ මන්ත්‍රීවරු 91ක් අද ජනාධිපතිතුමාට සහයෝගය දීමට අත්වැල් බැඳගෙන තිබෙනවා. ඒ අතර මහජන එක්සත් පෙරමුණ, ඊ.පී.ඩී.පී. ශ්‍රී ලංකා නිදහස් පක්ෂය, නිමල් සිරිපාල ද සිල්වා ඇතුළු ආණ්ඩුවේ සිටින මන්ත්‍රී කණ්ඩායම සහ මුස්ලිම් පක්ෂවල මන්ත්‍රීවරු, වතුකරයේ තොණ්ඩමන් මන්ත්‍රීතුමා ඇතුළු රාශියක් ආරම්භ කොට ඉදිරියට ගමන් කරන මේ මාවත දේශපාලනික හා ආර්ථික වශයෙන් ජයග්‍රහණය කිරීමේ ක්‍රියාවලිය තුළින්ම ඉදිරියට ගමන් කරවිය හැකි ශක්තිමත් විශ්වාසයක් අනාගත පරම්පරාවට දායාද කිරීමටයි අපි අත්වැල් බැඳගෙන වැඩ කරන්නේ.
රනිල් වික්‍රමසිංහ ජනාධිපතිතුමා සම්ප්‍රදායික පිළිවෙත්වලින් ඉවත් වෙලා සියලු දෙනා සමඟ අත්වැල් බැඳගෙන වැඩ කිරීම සඳහා සිදු කරා වූ ක්‍රියාදාමය තව ඉදිරියට ගෙනයමින් ස්වාධීන අපේක්ෂකයකු ලෙස ජනාධිපතිවරණයට තරග කිරීම විශේෂ අවස්ථාවක්. ජනාධිපතිවරණ ඡන්දවලට මුල සිට අද දක්වා මම සහභාගි වෙලා තියෙනවා. ඔය මොන සාකච්ඡාව කළත් අතරමග නතර වුණා. ජනාධිපතිතුමා ස්වාධීන පොදු අපේක්ෂකයෙක් හැටියට සියලුදෙනාට එක්ව මේ ජාතික කර්තව්‍ය ජයගැනීමට ඉදිරියට ගෙන යාමට හැකිවන සේ ස්වාධීන අපේක්ෂකයෙක් බවට එකඟ වී එසේ අනුගමනය කළ පියවරයන් අනුව මුදල් තැන්පත් කිරීමේ සිට මේ මැතිවරණ සටනට එකතුවීම අපි මහජන එක්සත් පෙරමුණ හා එපමණක් නොව අග්‍රාමාත්‍යතුමා හැටියට මේ ආණ්ඩුව ඉදිරියට ගේන්න විශාල පරිත්‍යාගයක් කළ 91 දෙනෙක් මේ ජයග්‍රහණය ඉදිරියට ගෙන යන්න තීරණය වුණා.
ප්‍රධාන ලේකම් නීතිඥ තිස්ස යාපා ජයවර්ධන, උපසභාපති රාජ්‍ය අමාත්‍ය සිසිර ජයකොඩි, නියෝජ්‍ය ලේකම් පාර්ලිමේන්තු මන්ත්‍රී යදාමිණි ගුණවර්ධන, උපලේකම් විජය රත්නායක, උපසභාපති හිටපු නියෝජ්‍ය කථානායක ගීතාංජන ගුණවර්ධන ඇතුළු මධ්‍යම කාරක සභිකයෝ මෙම අවස්ථාවට එක්වූහ.
