ශ්‍රී ලංකා පොදුජන පෙරමුණ විසින් වෙනම අපේක්ෂකයෙක් ඉදිරිපත් කිරීමට සූදානම්යැයි පැවසූ දා සිට රනිල් රාජපක්ෂ යන නාමය නැවත භාවිත කිරීමට හැකියාවක් නැති බව පාර්ලිමේන්තු කටයුතු පිළිබඳ ජනාධිපති ජ්‍යෙෂ්ඨ උපදේශක ආශු මාරසිංහ මහතා ප්‍රකාශ කළේය.
ඒ මහතා මේ බව පැවසුවේ සිරිකොත පක්ෂ මූලස්ථානයේ ඊයේ (01) පැවැති මාධ්‍ය හමුවට එක් වෙමිනි.එහිදී වැඩිදුරටත් පාර්ලිමේන්තු කටයුතු පිළිබඳ ජනාධිපති ජ්‍යෙෂ්ඨ උපදේශක ආශු මාරසිංහ මහතා මෙසේද පැවසීය.වර්තමානයේ දේශපාලන ධාරාවේ විවිධ කතා සමාජගතවන තත්ත්වයක් ඇතිවී තිබෙනවා.ඇතැම් කාරණා අපි බලාපොරොත්තු නොවන සහ හිතන්නෙවත් නැති කාරණා විවිධ ක්ෂේත්‍ර ඔස්සේ මතුවන බව පේනවා. අද පුවත්පතක පල වී තිබෙනවා පුවතක් තරුණ මන්ත්‍රීවරයෙක් ජනාධිපතිවරයාගෙන් දූෂණ විරෝධී පනත් කෙටුම්පත ගෙන ඒම ටිකක් ප්‍රමාද කරන්නයි ඉල්ලා සිටියා කියලා.මේ ප්‍රවෘත්තිය දැක්කාම හිතා ගන්න බැරිවුණා.මේ මන්ත්‍රීවරයා මේ දවස්වල විවිධ මාතෘකාවල සාකච්ඡාවට බඳුන්වන කෙනෙක්. ඒ අතරතුරේ රේගුවම ප්‍රකාශ කර තිබෙනවා තාක්ෂණයත් සමඟ ඉදිරියට යන්න බැරි හේතුවම මේ දූෂණ වංචා සිදුවීම කියලා. හැම තැනම තිබෙන මේ සිදුරු ටික වහලා දාන්න තමයි මේ දූෂණ විරෝධී පනත ගේන්නේ. ඒ සිදුරු වැහීමේ අපේක්ෂාවෙන් තමයි මේ පනත ගෙන ඒමට ජනාධිපති උත්සාහ ගන්නේ.රට ඉදිරියට යද්දී විවිධ හිතාගන්න බැරි ප්‍රවෘත්ති සමාජගත වෙනවා අපි දකිනවා පුතාණෝලා දෙන්නෙක් සාකච්ඡා ආරම්භ කර තිබෙනවා කියලා.පුවත්පත් කාටුනයකින් සජිත් ප්‍රේමදාස සහ නාමල් රාජපක්ෂ මහත්වරුන් කතා කරනවා ඇඳලත් තිබ්බා.මම මේ නිසාම පාර්ලිමේන්තුවේ හැන්සාඩ් වාර්තා අරගෙන පුංචි සමීක්ෂණයක් කර බැලුවා සජිත් ප්‍රේමදාස මහතා දැන් යම්කිසි කාලයක සිට රාජපක්ෂ හොර කල්ලිය කියන වචනය පාවිච්චි කරන්නේ නැහැ.
මේ නායකයෝ දෙන්නා කොළඹ ප්‍රදේශයේ තැන් කීපයකදී නිතර හමුවෙලා තිබෙනවයි කියා අපේ මන්ත්‍රීවරු කීපදෙනෙකුත් අපට කනින් කොනින් ආරංචි කිව්වා. ඒ වගේම නාමල් රාජපක්ෂ වෙනම පොහොට්ටුව අපේක්ෂකයෙක් දාන්න සූදානම් වෙනවා කියන දා ඉඳන්ම නැවත රනිල් රාජපක්ෂ කියන නාමය නැවත පාවිච්චි කරන්න හැකියාවක් නැහැයි කියන කාරණය ඉතා පැහැදිලිව පේනවා. අපි දැක්කා ඒ කාලේ තිබුණා රනිල් වැල් පාලමෙන් එතෙර කරන්න හදන්නේ නාමල් රාජපක්ෂ ද කියලා කියනවා. දැන් ඒ කාරණය ප්‍රතික්ෂේප වී තිබෙනවා.මොරටුව මහ නගර සභාවේ හිටපු නාගරික මන්ත්‍රී අනුර සිරිද සිල්වා මහතාද මෙහිදී අදහස් පළ කළේය.
