මැද පෙරදිග මතු වී ඇති තත්ත්වය අර්බුදයක් දක්වා දුරදිග ගියොත් ඊට මුහුණදීමට පූර්ව සූදානමක් ලෙස විශේෂ කමිටු තුනක් පත් කිරීමට ජනාධිපති රනිල් වික්‍රමසිංහ මහතා ගනු ලැබූ තීරණය ඉතා කාලෝචිත ක්‍රියාවක් බව විදේශ කටයුතු ඇමැති, ජනාධිපති නීතිඥ අලි සබ්‍රි මහතා පැවසීය.
ජාත්‍යන්තර වශයෙන් සිදුවන ක්‍රියාකාරකම් පාලනය කළ නොහැකි වුවත් එය හේතුවක් කරගෙන රටක් කඩා වැටෙන තෙක් බලා සිටිය යුතු නැති බව සඳහන් කළ ඇමැතිවරයා මතු විය හැකි ඕනෑම තත්ත්වයකට මුහුණදීමට අවශ්‍ය පියවර ගෙන තිබෙන බවද පෙන්වා දුන්නේය.
විදේශ කටයුතු ඇමැති, ජනාධිපති නීතිඥ අලි සබ්‍රි මහතා මේ බව සඳහන් කළේ ‘ස්ථාවර රටකට සැවොම එක මඟකට’ මැයෙන් ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට ඊයේ (01) එක්වෙමිනි.
ශ්‍රී ලංකාව තවත් වෙනිසියුලාවක් වීමට ඉඩ නොදී ආර්ථික වශයෙන් ස්ථාවර තත්ත්වයකට පත් කිරීමට හැකි වූයේ ජනාධිපති රනිල් වික්‍රමසිංහ මහතාගේ දුරදක්නා තීන්දු තීරණ හේතූ වූ බවත්,ඒ නිසා රට ගොඩනැඟීමට ජනාධිපතිවරයා ගෙන යන වැඩපිළිවෙළට පක්ෂ දේශපාලනය පසෙක තබා සහාය දීම සියලු දෙනාගේ වගකීම බවත් ඒ මහතා අවධාරණය කළේය.
එහිදී වැඩිදුරටත් ඇමැතිවරයා මෙසේද පැවසීය.
රටක් ලෙස පසුගිය වසර දෙකේ විශේෂයෙන්ම ජාත්‍යන්තර වශයෙන් අභියෝග රැසකට මුහුණදීමට සිදුවුණා.පළමු අභියෝගය වූයේ ජාත්‍යන්තර මූල්‍ය අරමුදල සමඟ පවතින වැඩසටහනට සම්බන්ධ වීම සඳහා පැරිස් සමාජය ඇතුළු මෙරට ණයහිමි රටවල සහාය ලබා ගැනීමයි.එහිදී එකිනෙකට වෙනස් මත තිබෙන රටවල් රැසක් සමඟ කටයුතු කිරීම ඉතා අසීරු කාර්යයක් බවට පත්ව තිබුණා.නමුත් ණය ප්‍රතිව්‍යුහගතකරණය සාර්ථක කර ගැනීම වෙනුවෙන් විදෙස් රටවල්වල සහාය ගැනීමට අප සමත් වුණා.එය අපගේ විදෙස් ප්‍රතිපත්තියේ ලද විශාල ජයග්‍රහණයක් බව පැවසිය යුතුයි.විදේශ ප්‍රතිපත්තිය පිළිබඳව ජනාධිපති රනිල් වික්‍රමසිංහ මහතාගේ එම දැනුම උපයෝගී කරගෙන විදෙස් රටවල් නිසි ලෙස කළමනාකරණය කරගෙන ඉදිරියට යෑමට අපට හැකියාව ලැබුණා.
පසුගිය මාසයේ ජපානය, සිංගප්පුරුව, රුමේනියාව සහ පෝලන්තය යන රටවල්වල කළ සංචාර ඉතා සාර්ථක වූ බව ද කිව යුතුයි.බොහෝ කලක් තිස්සේ පැවති ගැටලු රැසක් නිරාකරණය කර ගැනීමට සංචාර ඉවහල් වුණා. ජපානය විසින් අත්හිටුවා තිබූ ව්‍යාපෘති කීපයක් නැවත ආරම්භ කිරීමට අවශ්‍ය කටයුතු කෙරෙමින් පවතිනවා.එහිදී අත්හිටුවා තිබූ අමෙරිකානු ඩොලර් බිලියන 1.1ක ව්‍යාපෘති 13ක් නැවත ආරම්භ කිරීමට හැකි වී තිබෙනවා.සිංගප්පුරුව සමඟ ද ආයෝජන පිළිබඳව දීර්ඝ ලෙස සාකච්ඡා කළා.නව රැකියා අවස්ථා වැඩි කර ගැනීම ගැන රුමේනියාව සමඟ සාකච්ඡා කළා. පෝලන්තයේ මෙරට තානාපති කාර්යාලයක් නැති නිසා ඒ සම්බන්ධව ද සාකච්ඡා සිදුවුණා.
මේ සියල්ල සිදු කිරීමට අපට හැකියාව ලැබුණේ ජනාධිපති රනිල් වික්‍රමසිංහ මහතාගේ දුරදක්නා තීන්දු තීරණ නිසා බව පැවසිය යුතුයි.එතුමා එක් පාර්ශ්වයකට සීමා නොවී පෙරදිග හා අපරදිග රටවල් සියල්ලම කළමනාකරණය කර ගැනීමට අවශ්‍ය මඟ පෙන්වීම කළා.
ශ්‍රී ලංකාව සිය විදේශ ප්‍රතිපත්තිය හොඳින් කළමනාකරණය කරගෙන යන බවට ජාත්‍යන්තර රාජ්‍ය තාන්ත්‍රික කටයුතු පිළිබඳ ලොව පිළිගත් සඟරාවක් වන foreignpolicy.com හිද සඳහන් කර තිබෙනවා.රට වෙනුවෙන් විශාල ජයග්‍රහණ ප්‍රමාණයක් අත්පත් කර ගැනීමට අපගේ නිවැරදි විදෙස් ප්‍රතිපත්තියට අනුව හැකිව වී තිබෙන බව මේ අනුව තහවුරු වෙනවා.
ඒ වගේම දැනට මැද පෙරදිග මතු වී ඇති තත්ත්වය බලාපොරොත්තු නොවන ආකාරයේ අර්බුදයක් දක්වා දුරදිග ගියොත් ඊට මුහුණදීමට පූර්ව සූදානමක් වශයෙන් විශේෂ කමිටු තුනක් පත් කිරීමට ජනාධිපති රනිල් වික්‍රමසිංහ මහතා කටයුතු කළා.එහිදී එක් කමිටුවක් රටේ ජාතික ආරක්ෂාව සම්බන්ධවත්,අනෙක් කමිටුව අත්‍යවශ්‍ය භාණ්ඩ හිඟයක් ඇති නොවීමට වගබලා ගැනීම ඇතුළු ආර්ථික කේෂ්ත්‍රය සම්බන්ධවත් කටයුතු කරනවා.එම කමිටු දෙක නිරීක්ෂණය කිරීමට ජනාධිපතිගේ සහ අගමැතිගේ ප්‍රධානත්වයෙන් කමිටුවක් ද පත් කර තිබෙනවා.
2022 වසරේදී මෙරට ඉන්ධන අර්බුදයක් ඇති වුණා.ඊට විවිධ හේතූන් බලපෑවා.රුසියානු-යුක්‍රේන යුද්ධය හේතුවෙන් ඉන්ධන මිල ඉහළ ගියා.ගල් අඟුරු,තිරිඟු පිටි ආදියේ මිල ඉහළ ගියා. එම මිල ඉහළ යෑම දරා ගැනීමට නොහැකි වූ නිසා රට අර්බුදයට ගියා.එම උගත් පාඩම් සැලකිල්ලට ගෙන ජනාධිපති එවැනි තත්ත්වයක් යළිත් ඇති නොවීමට මේ ආකාරයට පූර්ව සූදානමක් ලෙස කමිටු පත් කර ක්‍රියාත්මක වීම ඉතා කාලෝචිත බව කිව යුතුයි.
ඒ අනුව අප රැස්වී රටේ බලශක්තිය ස්ථාවර කිරීමටත් සහ අත්‍යාවශ්‍ය භාණ්ඩ හිඟයකින් තොරව ලබා දීමට වැඩපිළිවෙළක් සකස් කිරීමට සාකච්ඡා කරනු ලැබුවා.ඕනෑම රටකට පාලනය කළ හැකි තත්ත්වය තිබෙනවා. නමුත් ජාත්‍යන්තරමය වශයෙන් සිදුවන ක්‍රියාකාරකම් රටකට පාලනය කළ නොහැකියි. එහෙත් එය අපේ පාලනයෙන් තොරවීම හේතුවක් කරගෙන රට කඩාවැටෙන තෙක් බලාගෙන සිටිය යුතු නැහැ.
ශ්‍රී ලංකාව තවත් වෙනිසියුලාවක් නොකර ස්ථාවර කිරීමට ගත වූ වසර දෙකක කාලයේ ජනාධිපති රනිල් වික්‍රමසිංහ මහතාට හැකියාව ලැබුණා.එබැවින් මේ රට අර්බුදයෙන් බේරා ගැනීමට රනිල් වික්‍රමසිංහ මැතිතුමාට සහාය ලබාදීමට අප විසින් 2022 වසරේදී ගනු ලැබූ තීරණය පිළිබඳව අද සතුටට පත් වෙනවා.
රටක් ලෙස ඉතා දුෂ්කර තත්ත්වයක සිට යම් ස්ථාවරත්වයක් වෙත පැමිණ ඇති නමුත්,මෙය අතුරේ ගමනකට සමානයි.සිදුවන සුළු එහා මෙහා වීමකින් යළිත් අගාධයට ඇදවැටිය හැකියි.විපක්ෂයට අවශ්‍ය රට අතුරෙන් වට්ටා යළි අපායට දමන්නද? නැතිනම් අපායෙන් මිදීම ස්ථීර කර ගන්නද? යන්න කෙරෙහි අවධානය යොමු කළයුතුයි. එබැවින් ශක්තිමත් ආර්ථිකයක් ඇති කිරීම වෙනුවෙන් ජනාධිපති රනිල් වික්‍රමසිංහ මහතා ගෙන යන ආර්ථික වැඩපිළිවෙළට පක්ෂ දේශපාලනය පසෙක තබා සහාය දැක්වීම සියලු දෙනාගේ වගකීමක් වෙනවායිද පැවසීය.
