බාලදක්ෂ ව්‍යාපාරය, ශිෂ්‍ය භට බළකාය සහ යොවුන් සේනාංකය වැනි තරුණ සංවිධාන සෑම අතින්ම ශක්තිමත් කර රටේ ඉදිරි ගමන වෙනුවෙන් තාරුණ්‍යය පුළුල් ලෙස දායක කර ගැනීම තම අරමුණ බව ජනාධිපති රනිල් වික්‍රමසිංහ මහතා පැවැසීය. ඒ වෙනුවෙන් අවශ්‍ය ප්‍රතිපාදන, රජය දැනටමත් වෙන් කර ඇති බව පෙන්වා දුන් ජනාධිපතිවරයා ඉදිරියේ දී ද ඊට අවශ්‍ය ප්‍රතිපාදන වෙන් කරන බව කියා සිටියේය.
ජනාධිපති රනිල් වික්‍රමසිංහ මහතා මේ බව සඳහන් කළේ ශ්‍රී ලංකා බාලදක්ෂිකා සංගමයේ සාමාජිකාවන්ට ජනාධිපති පදක්කම් පිරිනැමීම වෙනුවෙන් කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ ඊයේ (31) පැවැති උත්සවයට එක්වෙමිනි.
ජනපති අතින් තිළිණ ළබමින්
75,000ක් වූ බාලදක්ෂිකා ව්‍යාපාරයේ සාමාජිකත්වය 150,000 දක්වා ඉහළ නැංවීමට අවශ්‍ය සහාය ලබා දෙන බව ද ජනාධිපතිවරයා මෙහිදී පැවැසීය.
බාලදක්ෂ ව්‍යාපාරය, ශිෂ්‍ය භට බළකාය සහ යොවුන් සේනාංක වැනි තරුණ සංවිධාන හරහා මත්ද්‍රව්‍ය නිවාරණ වැඩපිළිවෙළට ද පුළුල් දායකත්වයක් ලබාගත හැකි බව ජනාධිපතිවරයා පෙන්වා දුන්නේය.
බාල දක්ෂිකාවන් 2000ක් සඳහා ජනාධිපති පදක්කම් පිරිනැමීම මෙහිදී ජනාධිපති රනිල් වික්‍රමසිංහ මහතාගේ ප්‍රධානත්වයෙන් සිදු කෙරිණි.
ශ්‍රී ලංකා බාලදක්ෂිකා සංගමයේ සභාපතිනි ශාන්ති විල්සන් මහත්මිය විසින් ජනාධිපති රනිල් වික්‍රමසිංහ මහතා වෙනුවෙන් ද විශේෂ සිහිවටන තිළිණයක් පිළිගැන්වූවාය.
මෙහිදී වැඩිදුරටත් ජනාධිපති රනිල් වික්‍රමසිංහ මහතා මෙසේද පැවැසීය.
“බාලදක්ෂ ව්‍යාපාරය ගැන මට හොඳ අවබෝධයක් තිබෙනවා. මගේ පවුලේ කීපදෙනෙක්ම මේ සංවිධානයේ ක්‍රියාකාරිව කටයුතු කළා. බාලදක්ෂ ව්‍යාපාරය තවදුරටත් දියුණු කළ යුතුයි. බාලදක්ෂිකා සංගමයට අවශ්‍ය ගොඩනැඟිල්ලක් ලබාදෙන ලෙස ඉල්ලීමක් ඉදිරිපත් කෙරුණා. ඒ ඉල්ලීම ඉටු කිරීමට පියවර ගන්නා බව සඳහන් කළ යුතුයි. බාලදක්ෂ ව්‍යාපාරය, ශිෂ්‍ය භට බළකාය මෙන්ම යොවුන් සේනාංක සඳහා අවශ්‍ය මුදල් රජය වෙන් කර තිබෙනවා. අනෙක් සංවිධාන ක්‍රියාත්මක කිරීම වෙනුවෙන් වෙනම මුදල් ප්‍රමාණයක් ආණ්ඩුවෙන් ලබාදීමට බලාපොරොත්තු වෙනවා.
මෙලෙස මුදල් වෙන් කිරීමට හැකියාව ලැබී තිබෙන්නේ ආණ්ඩුවට දැන්. ඒ මුදල් ටිකක් තිබෙන නිසයි. මම මේ රට භාර ගනිද්දි ආණ්ඩුවට මුදල් තිබුණේ නැහැ. අපි දැන් අසීරු කාලය පසු කර තිබෙනවා. පාඩු ලබන රාජ්‍ය සංස්ථාවලට මුදල් යොදවන එක අපි දැන් නතර කර තිබෙනවා. ඒ වගේම විදේශ ණය ලබා ගැනීම ද නතර කර තිබෙනවා. අපට ගෙවීමට තිබෙන ණය ප්‍රමාණයත් අඩු වෙලා. ඒ නිසා දැන් ආණ්ඩුව යම් මුදල් ප්‍රමාණයක් තරුණ පරපුර වෙනුවෙන් යෙදවීමට බලාපොරොත්තු වෙනවා.
මේ වන විට අධ්‍යාපනය වෙනුවෙන් පුළුල් වැඩපිළිවෙළක් සකස් කරමින් තිබෙනවා. ඉදිරි අවුරුදු කීපයේ දී ඒ වෙනුවෙන් විශාල මුදලක් වැය කිරීමට අපට සිදු වෙනවා. සෞඛ්‍ය ක්ෂේත්‍රය සඳහා ද අවශ්‍ය මුදල් අප වෙන් කිරීමට සැලසුම් සහගතව අප කටයුතු කරමින් සිටිනවා.
අධ්‍යාපන අංශය පොතපතට සීමා කරන්න බැහැ. දරුවන්ට ඉදිරියට යෑමට නව අවස්ථා සොයා දිය යුතුයි. ඒ සඳහා අප ඉදිරියේ දී මුදල් වැය කරනවා. එහිදී බාලදක්ෂ ව්‍යාපාරය සෑම අංශයකින්ම දියුණු කිරීමට බලාපොරොත්තු වෙනවා. 75,000ක් වන මෙහි සාමාජිකත්වය ඉදිරියේදී 150,000ක් බවට පත් කර ගත යුතුයි. ඊට අවශ්‍ය සහාය ලබාදීමට රජය බලාපොරොත්තු වෙනවා.
මෙවන් සංවිධාන හරහා අපට විශාල වැඩ කොටසක් ඉටු කළ හැකියි. මත්ද්‍රව්‍ය මර්දන කමිටුව සමඟ සාකච්ඡා කළ විට ඔවුන් සඳහන් කළේ පාසල්වල වැඩි වශයෙන් බාලදක්ෂ සංවිධාන සහ ශිෂ්‍ය භට බළකාය ඇති කළ යුතුයි කියලයි. මත්ද්‍රව්‍ය මර්දන වැඩපිළිවෙළට එමඟින් විශාල දායකත්වයක් ලබා ගත හැකියි.
ඒ වගේම දිස්ත්‍රික් මට්ටමින් සහ ජාතික මට්ටමින් බාලදක්ෂ කඳවුරු ඇති කිරීමට යම් කාලයකට රජයේ ගොඩනැඟිලි ලබාදිය හැකියි. අධ්‍යාපන අමාත්‍යාංශය සමඟ එක්වී එම වැඩසටහන් ක්‍රියාත්මක කිරීමට කටයුතු කරන මෙන් ඉල්ලමින් ඔබ සියලුදෙනාට මම සුබ පතනවා.
අධ්‍යාපන අමාත්‍යංශයේ ලේකම් තිලකා ජයසුන්දර, ශ්‍රී ලංකා බාලදක්ෂ සංගමයේ ප්‍රධාන බාලදක්ෂ කොමසාරිස් නීතිඥ ජනප්‍රිත් ප්‍රනාන්දු ශ්‍රී ලංකා බාලදක්ෂිකා සංගමයේ ප්‍රධාන කොමසාරිස් ආචාර්ය කුෂන්තා හේරත් මහත්ම මහත්මීන් සහ බාල දක්ෂිකාවන් විශාල පිරිසක් මේ අවස්ථාවට එක්ව සිටියහ.
