ශ්‍රී ලංකා නිදහස් පක්ෂය තුළ නීත්‍යානුකූල අයිතියක් නොමැති ඇමැති නිමල් සිරිපාල ද සිල්වා මහතාගේ පාර්ශ්වය විසින් මෙවර ජනාධිපතිවරණයේදී ජනාධිපති රනිල් වික්‍රමසිංහ මහතාට සහාය දීමට තීරණය කර ඇත්තේ පක්ෂයේ ප්‍රතිපත්තිවලට පටහැනිව යමින් බව ශ්‍රී ලංකා නිදහස් පක්ෂයේ ලේකම්, පාර්ලිමේන්තු මන්ත්‍රී දයාසිරි ජයසේකර මහතා පවසයි.
මේ පිරිස ජනාධිපති රනිල් වික්‍රමසිංහ මහතාට සහාය දෙන බව අමුතුවෙන් ප්‍රකාශ කිරීමේ අවශ්‍යතාවක් නොමැති බවත්, මේ කණ්ඩායම ජනාධිවරයා ප්‍රමුඛ වත්මන් ආණ්ඩුව යටතේ තනතුරු වරදාන, වරප්‍රසාද ලබන කණ්ඩායමක් බවත් මන්ත්‍රීවරයා පැවැසීය.
මන්ත්‍රීවරයා මේ බව සඳහන් කළේ ඊයේ (01) පෙරවරුවේ මාධ්‍ය සාකච්ඡාවක් පවත්වමිනි.
එහිදී වැඩිදුරටත් අදහස් දැක්වූ මන්ත්‍රීවරයා මෙලෙස ද කීවේය.
“නිමල් සිරිපාල ද සිල්වා මහතාගේ පාර්ශ්වය විසින් ගන්නා ලද මේ තීන්දුවට පිරිසක් එකඟවී නෑ. ශ්‍රී ලංකා නිදහස් පක්ෂ මූලස්ථානයේ නිමල් සිරිපාල ද සිල්වා මහතා ඇතුළු පිරිස විසින් පසුගියදා අනීතිකව රැස්වීමක් පවත්වා තිබෙනවා. එම කරුණත් එක්ක එතැනට පැමිණ සිටි සංවිධායකයන් පිරිසක් ඒ අය ජනාධිපතිවරණය සම්බන්ධයෙන් ගෙන ඇති තීරණය පිළිබඳව විරෝධය පළ කර තිබෙනවා. ජනාධිපතිවරණය සම්බන්ධයෙන් මේ අය ගත් තීරණයට විරුද්ධවී තිබෙනවා, එක් පිරිසක්. නමුත් මේ අය එක තීන්දුවකට ආ බව මාධ්‍යයට ප්‍රකාශ කර තිබෙනවා.
නිමල් සිරිපාල ද සිල්වා මහතාගේ පිල ශ්‍රී ලංකා නිදහස් පක්ෂයේ ප්‍රතිපත්තිවලට විරුද්ධව ගිහින් තමයි රනිල් වික්‍රමසිංහ මහතාට සහාය දීමට තීරණය කළේ. කිසිම වෙලාවක ශ්‍රී ලංකා නිදහස් පක්ෂය ආණ්ඩුවත් එක්ක වැඩ කළ යුතු යැයි කියා තීරණයක් ගෙන තිබුණේ නෑ. මධ්‍යම කාරක සභාවේ එවන් තීරණයක් ගෙන තිබුණේ නෑ. එසේ තිබියදී තමයි මේ පිරිස ආණ්ඩුවට එකතු වෙලා තනතුරු ගත්තේ. ඒ අයට එරෙහිව විනය පරීක්ෂණ පවා පැවැත්වූවා. මේ කරුණුත් එක්ක මට විරුද්ධව මේ අය මගේ ලේකම් ධූරය අභියෝගයට ලක්කර කිසිම නඩුවක් පවරා නෑ.
එදා ඔවුන් අපේ නඩුවකට ඇතුළු වුණා. ලසන්ත අලගියවන්න මහතා අතුරු තහනම් නියෝගයක් ඉල්ලා සිටියා. ගරු අධිකරණය විසින් එය ඉවත් කළා. ඒ අනුව අධිකරණය තුළ මට විරුද්ධව ඒ අය විසින් කිසිදු නීතිමය කරුණකට ගිහින් නෑ. නමුත් ඔවුන් හැම වෙලාවෙම කියන්නේ ඒ අයට විරුද්ධව අධිකරණයට ගිහින් නෑ කියලයි. නමුත් ඒ අයට එරෙහිව උසාවි ගිහින් තිබෙනවා. නඩු හයකට වැඩිය තිබෙනවා. දුමින්ද දිසානායක මහතාගේ නීතිය පිළිබඳ දැනුම ගැන මම කනගාටු වන්නේ නෑ. සාමාන්‍යයෙන් අතුරු සහන හා ස්ථාවර සහන ඉල්ලනවා. නඩුව අවසාන නෑ. අවසාන තීන්දුවක් දක්වා කටයුතු සිදු වෙමින් තිබෙනවා. නඩුවේ ක්‍රියාකාරීත්වය ඉදිරියට යනවා. නඩුව ඉදිරියට යන්න කරුණු තිබෙන බව පිළිගෙන තිබෙනවා. පැහැදිලිව පේන කරුණ තමයි අනීතික පිරිසක් විසින් නීත්‍යානුකූලව පත්ව සිටින ලේකම්වරයාට පක්ෂ මූලස්ථානයට ඇතුළු වීමට ඉඩ නොදී ආණ්ඩුවේ සහ පොලිසියේ බලය පාවිච්චි කරමින් පක්ෂ මුලස්ථානය බලහත්කාරයෙන් අත්පත් කරගෙන සිටින පිරිසක් තමයි මේ ආකාරයට කටයුතු කරන්නේ. මෙවර ජනාධිපතිවරණයේදී වත්මන් ජනාධිපතිවරයාට සහාය දීමට ඉදිරිපත් කරන ලද යෝජනාවකට අත ඔසවා සහාය ප්‍රකාශ කළා යන කාරණය අපි ප්‍රතික්ෂේප කරනවා. මේ පිරිසට ශ්‍රී ලංකා නිදහස් පක්ෂයේ කිසිදු නීත්‍යානුකූල අයිතියක් නෑ. අද වන විට පක්ෂය තුළ සභාපතිවරයකුත් නෑ. සභාපතිවරයකුත් නැති අවස්ථාවක නිමල් සිරිපාල ද සිල්වා මහතා අනීතික ලෙස කටයුතු කර තිබෙනවා. අපි එය පිළිගන්නේ නෑ. ශ්‍රී ලංකා නිදහස් පක්ෂය ලෙස කටයුතු කරන්න ඒ අයට කිසිදු නීත්‍යානුකූල අයිතියක් නෑ. අපිත් ඒ අයට එරෙහිව දාපු නඩු ගණනාවක් තිබෙනවා. ඒවාගේ තීන්දු ඉදිරියේදී ලැබේවි. ඒ අනුව අවශ්‍ය කටයුතු සිදු කරනවා. ඒ අනුව මේ අය කොහොමත් රනිල් වික්‍රමසිංහ මහතා සමඟ වැඩ කළ අය. අමුතුවෙන් ශ්‍රී ලංකා නිදහස් පක්ෂය රනිල් වික්‍රමසිංහ මහතාට සහාය දෙනවා කියලා කීමේ අවශ්‍යතාවක් නෑ. මේ අය කොහොමත් රනිල් වික්‍රසිංහ මහතාට සහාය දීපු අය. මේ සම්බන්ධයෙන් අපට කියන්න තිබෙන්නේ ශ්‍රී ලංකා නිදහස් පක්ෂය ලෙස ඒ කණ්ඩායමට කිසිම අයිතිවාසිකමක් නෑකටයුතු කරන්නට.”
ශ්‍රී ලංකා නිදහස් පක්ෂයේ උප සභාපති කීර්ති උඩවත්ත මහතා ද මෙහිදී අදහස් දැක්වීය.
