ශ්‍රී ලංකා වරාය අධිකාරියේ 45වැනි සංවත්සරය අභිමානවත් සහ චාම් අයුරින් වරාය සම්බුද්ධත්ව ජයන්ති චෛත්‍ය පරිශ්‍රයේදී ඊයේ (01) පැවැත්විණි.
වරාය, නාවික හා ගුවන් සේවා ඇමැති නිමල් සිරිපාල ද සිල්වා මහතාගේ ප්‍රධානත්වයෙන් මෙය පැවති අතර, ආගමික කටයුතුවලට මුල්තැන දෙමින් එය සිදු කෙරිණි.
වරාය කොමිෂන් සභාව, ආරක්ෂක හා සැසඳුම් සංස්ථාව සහ නැව් භාණ්ඩ සංයුක්ත මණ්ඩලය එක් කරමින් 1979 අගෝස්තු මස 01 වැනි දින අතිවිශේෂ ගැසට් පත්‍රයකින් ශ්‍රී ලංකා වරාය අධිකාරිය පිහිටුවා තිබෙන අතර, දිවංගත වරාය ඇමැති ලලිත් ඇතුලත්මුදලි මහතා ඊට මූලිකත්වය ගෙන කටයුතු කර තිබේ.
එලෙස ආරම්භ කෙරෙන ශ්‍රී ලංකාවේ වාණිජ වරායන් හි සංවර්ධනය ශ්‍රී ලංකා වරාය අධිකාරිය යටතේ ඉතා සැලසුම් සහගතව, වේගවත් මෙන්ම මහා පරිමාණ යෝජනා ක්‍රම ලෙස ක්‍රියාත්මක විය. ඒ අනුව ඒ වන විට ලොව පුරා ප්‍රචලිත වෙමින් පැවති නව භාණ්ඩ ප්‍රවාහන මාධ්‍යයන් ලෙස හඳුන්වාදී තිබූ බහලු හැසිරවීම හෙවත් බහලු මෙහෙයුම් සඳහා උචිත ලෙස කොළඹ වරාය සංවර්ධනය කිරීම ආරම්භ විය. ඒ අනුව දකුණු ආසියාවේ පළමු බහලු මෙහෙයුම් පර්යන්තය ලෙස ජයබහලු පර්යන්තය ඉදිවිය.
ගෝලීය බහලු මෙහෙයුම් ක්‍රියාවලියේ ප්‍රධාන ප්‍රවර්ධනය සැලකිල්ලට ගෙන කොළඹ වරායේ සංවර්ධන ව්‍යාපෘති ගණනාවක් පසුගිය කාලයේ අවසන් කර ඇති අතර, තවත් ව්‍යාපෘති ගණනාවක් ක්‍රියාත්මක කරමින් පවතී. ඒ අනුව ජය බහලු පර්යන්තය තවත් මීටර් 120කින් දීර්ඝ කර ඇති අතර, මෙමඟින් මීටර් 300ට වැඩි විශාල නෞකා රැසක් එකවර මෙහෙයුම් කිරීමට හැකියාව ලැබී තිබේ. මින් පෙර ජයබහලු පර්යන්තයට නොපැමිණි විශාල නෞකා මෙහෙයවීමේ හැකියාව ජයබහලු පර්යන්තයට ලැබී තිබේ.
එසේම නැඟෙනහිර බහලු පර්යන්තය සඳහා ඇණවුම් කරන ලද ග්‍රැන්ටි දොඹකරවලින් දොඹකර 06ක් දැනටමත් එහි ස්ථාපිත කර ඇති අතර, එහි මෙහෙයුම් කටයුතු ඉතා සාර්ථකව සිදු කරමින් පවතී. මෙය වරාය අධිකාරිය බහලු මෙහෙයුම් සම්බන්ධයෙන් අත්කරගත් විශාල ජයග්‍රහණයක් වන අතර, මෙමඟින් වරාය අධිකාරිය සතු පර්යන්තවල වෙළෙඳපොළ කොටස් වැඩි කරගැනීමට හැකියාව ලැබී ඇත.
මෙහිදී අදහස් දක්වමින් ඇමැතිවරයා මෙලෙස සඳහන් කළේය.
“මේ මොහොතේ දිවංගත ලලිත් ඇතුලත්මුදලි මහතා ගෞරවයෙන් සිහිපත් කරනවා. එතුමා විශේෂ දැක්මකින් වරායේ අභිවෘද්ධියට කටයුතු කළා. අද දවසේ වරාය සංවර්ධනය උදෙසා ගතානුගතික සාම්ප්‍රදායික ක්‍රමවේදයන්ගෙන් ඈත්වී නූතන තාක්ෂණය සමඟ බද්ධ වෙමින් රාජ්‍ය පෞද්ගලික දෙපාර්ශ්වයේ සහසම්බන්ධතා සමඟින් ඉදිරියට යා යුතුයි. දේශපාලන මතිමතාන්තරවලින් තොරව සමුද්‍රීය කලාපයේ තරගකාරී වරායන් සමඟ උරෙන්උර ගැටී කටයුතු කිරීමට කාලය එළැඹ තිබෙනවා.”
මීට සමගාමීව ජයබහලු පර්යන්තයේ පරිගණක අංශයේ සේවක මහත්ම මහත්මීන් විසින් සංවිධාන කරන ලද ලේ දන්දීමේ සත්කාරක වැඩසටහනට ද ඇමැතිවරයා සහභාගි විය.
මේ අවස්ථාවට ශ්‍රී ලංකා වරාය අධිකාරියේ සභාපති කීත් ඩී. බර්නාඩ්, උප සභාපති ගයාන් අල්ගේවත්තගේ, කළමණාකාර අධ්‍යක්ෂ ප්‍රභාත් ජේ මලවිගේ මහත්වරුන්, අධ්‍යක්ෂවරුන්, කොට්ඨාස ප්‍රධානීන්, විධායක නිලධාරීන්, සේවක සේවිකාවන් සහ වෘත්තීය සමිති නියෝජිතයන් ඇතුළු විශාල පිරිසක් සහභාගි වූහ.
