ඉන්දීය සුපිරි රංගන ශිල්පිනී රම්බා යාපනයට පැමිණීමත් සමඟම ඇගේ රසික රසිකාවියන් විශාල පිරිසක් ඇය දැකීමට යාපනය ජාත්‍යන්තර ගුවන්තොටුපොළට පැමිණීම නිසා ගුවන්තොටුපොළ අසල දැඩි නොසන්සුන්තාවක් පෙරේදා (31) ඇති වී තිබිණි.
රම්බාට මල් කලඹ පිළිගැන්වීමටත් ඇයව දැකීමටත් ඇය සමඟ සෙල්ෆි ඡායාරූප ගැනීමටත් විශාල පිරිසක් ගුවන්තොටුපොළ පර්යන්තයට ඇතුළුවීමට උත්සාහ කිරීම නිසා ඇති වූ නොසන්සුන් තත්ත්වය පාලනය කිරීම පිණිස පොලිස් බල ඇණි කීපයක්ද යෙදවීමට සිදුව තිබිණි.
ඉන්දියාවේ සිට පෞද්ගලික ගුවන් යානයකින් රම්බා හා ඇගේ සැමියා ද තවත් කීප දෙනෙකු ද යාපනයට පැමිණ සිටියේ ඔවුන්ගේ වියදමින් යාපනයේ පවත්වාගෙන යන පෞද්ගලික විශ්වවිද්‍යාලයක උපාධි හා ඩිප්ලෝමා සහතික ප්‍රදානය කිරීමේ උත්සවයකට සහභාගි වීමටය.
යාපනයේ උපන් රම්බාගේ සැමියාගේ උපන් දිනය ද මේ සතියේ යාපනයේදී සැමරීමට රම්බා හා ඇගේ සැමියා බලාපොරොත්තු වෙයි.
පසුගිය වසරේ පෙබරවාරි 9දා ඉන්දීය සුපිරි ගායක හරිහරන්ගේ ප්‍රධානත්වයෙන් පැවති මහා සංගීත රාත්‍රියකට රම්බා පැමිණ නර්තනයක් ඉදිරිපත් කරමින් සිටියදී යාපනයේ රසික රසිකාවියන් වේදිකාව දෙසට යෑමට උත්සාහ කිරීම නිසා විශාල කලබලයක් ඇති වූ අතර ඒ හේතුව මත ප්‍රසංගය අවලංගු කිරීමට ද සංවිධායකවරුන්ට සිදුවිය.
ඒ අවස්ථාවේදී කුපිත වූ පිරිසක් වේදිකාවේ හා අවට තිබූ භාණ්ඩවලට පහරදීම නිසා රුපියල් ලක්ෂ ගණනක පාඩුවක් සිදු වූ අතර නව දෙනෙකු පොලිස් අත්අඩංගුවට ගැනීමට ද සිදුවිය.
