පොලොන්නරුව පොලිස් ස්ථානයට අනුයුක්තව සේවයේ නිරත ප්‍රධාන පොලිස් පරීක්ෂකවරියකගේ ජංගම දුරකතනයට ඇමතුමක් ගෙන ඇයට හා දරුවන්ට බැණ තර්ජනය කළ පොලිස් කොස්තාපල්වරයකුට පොලොන්නරුව මහේස්ත්‍රාත් අධිකරණය විසින් මාස 6ක බරපතළ වැඩ ඇතිව සිරදඬුමක් නියම කරමින් එය වසර 5කට අත්හිටුවනු ලැබීය.
මේ සිරදඬුවමට අමතරව රු. 1,500ක දඩයකටද මේ පොලිස් කොස්තාපල්වරයා යටත් කරනු ලැබීය. මෙසේ දඬුවම් නියම වූයේ මේ වන විට වවුනියාව පොලිස් ස්ථානයට අනුයුක්තව සේවයේ නිරත පොලිස් කොස්තාපල් සී.ජේ. වෙලගෙදර නමැති නිලධාරියාටය. මොහු වැලිකන්ද පොලිස් ස්ථානයට අනුයුක්තව සේවයේ නිරතව සිටියදී 2022 වසරේ අප්‍රේල් 29 දා මේ සිදුවීම වී තිබේ. පොලිස් කොස්තාපල්වරයා කළ තර්ජනය සම්බන්ධයෙන් ප්‍රධාන පොලිස් පරීක්ෂකවරිය කළ පැමිණිල්ලකට අනුව කොස්තාපල්වරයා අත්අඩංගුවට ගෙන අධිකරණයට කරුණු වාර්තා කිරීමට පොලොන්නරුව පොලිසිය පියවර ගෙන තිබිණි. ඒ සම්බන්ධයෙන් පැවති නඩු විභාගයේ තීන්දුව පෙරේදා (31) ප්‍රකාශ කරමින් පොලිස් කොස්තාපල්වරයාට මේ දඬුවම නියම වී තිබේ.
