සෝමාවතී ජාතික වනෝද්‍යානයේ තුන්මෝදර ප්‍රදේශයට මෝටර් බෝට්ටුවක් ආධාරයෙන් මූතූර් ප්‍රදේශයේ සිට මහවැලි ගඟ දිගේ පැමිණ, එහි සතුන් දඩයම් කරමින් සිටි සිව්දෙනකුට අයකුට රු. 35,000 බැගින් රු. 140,000ක දඩ මුදලක් පෙරේදා (31) නියම කළ මූතූර් මහේස්ත්‍රාත් එච්.එම්. තස්ලිම් ෆවුසාන් මහත්මිය බෝට්ටුවද රාජසන්තක කළාය.
මෙසේ දඩ නියම වූයේ මූතූර් ප්‍රදේශයේ පදිංචි සිව්දෙනකුටය. මේ පිරිස ඉකුත් පෙබරවාරි 4 දින බෝට්ටුවකින් මහවැලි ගඟ දිගේ පැමිණ වනෝද්‍යානයට ඇතුළු වී, කොටන තුවක්කුවකින් සතුන් දඩයමේ යෙදී සිටි අතරතුර කන්තලේ වනජීවී නිලධාරීන් සහ පොලිස් විශේෂ කාර්ය බළකාය හා එක්ව කළ මෙහෙයුමකදී අත්අඩංගුවට ගෙන මූතූර් අධිකරණය වෙත ඉදිරිපත් කරනු ලැබූහ. එහි අවසන් නඩු තීන්දුව ප්‍රකාශයට පත් කරමින් මහේස්ත්‍රාත්වරිය මේ නියෝගය දුන්නාය.
වනජීවී සංරක්ෂණ දෙපාර්තමේන්තුවේ ත්රිකුණාමල දිස්ත්රික් සහකාර අධ්‍යක්ෂගේ උපදෙස් හා මඟපෙන්වීම මත හා පරෙවි දූපත් ජාතික උද්‍යානයේ භාරකාරයාගේ මඟපෙන්වීම මත මේ මෙහෙයුම සිදු කර ඇති අතර, පෙරේදාට යෙදුණු ලෝක වනජීවී ආරක්ෂකයන්ගේ දිනය දා එහි තීන්දුව ලැබීම විශේෂ කරුණක් බව කන්තලේ වනජීවී නිලධාරීහු පැවසූහ.
